Medeniýet ministrliginiň şekillendiriş sungaty sergi merkezinde türkmen suratkeşleriniň ýakyn günlerde belleniljek Garaşsyzlyk gününe bagyşlanan işleriniň sergisi guraldy.
Sergi merkeziniň ikinji gatynyň esasy ýerini gönüden-göni öňde duran Baş baýramymyza bagyşlanyp çekilen suratlar – Şöhle Bakkalowanyň «Doganlyk dostlugyň Watany», Aýgözel Annamyradowanyň «Bagtly çagalyk» we Gyzylgül Hudaýberdiýewanyň «Garaşsyzlyk mukamy» işleri eýeläpdir. Bularyň ählisi-de tomaşaçylara şatlyk we bagtyýarlyk duýgusyny paýlaýar.
Türkmenistanyň halk suratkeşi Rejepmuhammet Berdiýew «Synagyň öňüsyrasynda», «Günortan nahary» we «Küýzeli gyzlar» atly üç suraty hödürledi we bulara üns bermezlik asla mümkin däl. Rejepmuhammet Berdiýew Türkmenistanyň halk suratkeşi Ýarly Baýramowyň şägirdi, ähtimal, onuň işleriniň mugallymynyňky ýaly özüne çekiji bolmagy şunuň üçin bolsa gerek.
Irina Dolgowanyň işleri-de sergä gelenleri geň galdyrdy. Ol «Türkmen däpleri» at bilen birleşen tegelek görnüşi suratlaryň üçüsini hödürledi. Irina gahrymanlaryny göwrümleýin illýuziýada suratlandyrmagyň hötdesinden gelipdir. Bu – örän gyzykly we täzeçil usuldyr.
Saparmämmet Meredowyň ýerine ýetiren diwarlygy tomaşaçylar üçin garaşylmadyk bir zat boldy. Ol meşhur sungat işgärleriniň – Jemal Saparowanyň, Babasary Annamyradowyň, Gylyçmyrat Ýarmämmedowyň, Saragt Babaýewiň we Bäşim Nuralynyň grafiki portretlerini görkezdi. Iň gyzyklysy – bu portretleriň hemmesi olaryň ýaşlyk ýyllarynda çekilipdir, bu gün bolsa olary diňe käbir alamatlar boýunça tanamak bolýar.
Hemişe bolşy ýaly, keramikaçy Dilber Umarowa özüniň tükeniksiz hyýaly bilen sergä gelenleri begendirdi. Oba durmuşyndan alnan terrakota heýkeljikler, mowzuklaryň sadalygy we özüne çekijiligi bilen geň galdyrýar. «Maşgala», «Üç ulugyz», «Tamdyrçy» we «Söýgi küýzeleri» işleri sergide ýene-de uly üstünlik gazandy.
Änew şäheriniň medeniýet merkeziniň bezegçisi Gülälek Babakulowa sergä gurjaklar ýygyndysyny hödürledi. 28 gurjagyň ählisi-de milli geýimde ýasalypdyr. Serginiň merkezinde hat bukjasy şekilli bukjalar görkezildi. Bukja – gyz maşgalanyň milli esbaby, oňa iňňe-sapak, temençe we ş.m. salynýar. Bukjanyň ýanynda milli matalardan tikilen we türkmen nagyşlary bilen bezelen çaga köýnekleri hem bar.
Gülälek Türkmenistanyň hemişelik Bitaraplygynyň 30 ýyllygyna bagyşlanyp açyljak sergä-de şuňa meňzeş, ýöne oglan gurjaklar ýygyndysyny hödürlemegi meýilleşdirýär.
Sergide 144 iş görkezildi. Ajaýyp suratlardan başga-da, bulara keramika, zergärçilik, heýkeltaraşlyk işleri degişli. Olaryň hersi tomaşaçylaryň aýratyn ünsüne mynasyp boldy.
