Maýa Kulyýewa adyndaky Türkmen milli konserwatoriýanda Halkara ыaz günine bagyşlanyp konsert geçirildi. Konsertiň diňleýjileriniň aglabasynyň ýaşuly adamlar bolandygyny aýtmalydyrys. Sebäbi her ýyl ýurdumyzda bellenilýän Ýaşulularyň halkara güni bilen Saz güni bir güne gabat gelýär. Şonuň üçin konserti guraýjylar – kamera ansambly kafedrasynyň hünärmenleri ýaşuly nesliň wekillerini bu konserte ýörite çagyrdylar.
Däp bolşy ýaly, konsertiň açylyş dabarasy dutarda ýerine ýetirilen saz bilen açyldy. Bu meşhur saz guralynda Türkmenistanyň Prezidentiniň yglan eden «Türkmeniň Altyn asyry» bäsleşiginiň ýeňijisi Laçyn Hudaýberdiýewa «Balsaýat» türkmen halk aýdymyny ýerine ýetirdi. Konsertde Rejep Rejepowyň, Bahyň, Puççininiň, Hydyr Allanurowyň, Şopeniň, Raweliň, Werdiniň, Swiridowyň we beýleki belli kompozitorlaryň eserleri hem ýaňlandy.
Tomaşaçylar esasan-da tenor Meýlis Myratgeldiýewiň çykyşyny aýratyn belläp geçdiler. Ol Hydyr Allanurowyň «Söwer ýar» eserini ýerine ýetirdi. Şeýle hem Türkmenistanyň Prezidentiniň yglan eden «Türkmeniň Altyn asyry» bäsleşiginiň ýeňijisi Begenç Moşşyýewiň çykyşyny tomaşaçylar el çarpyşmalar bilen garşyladylar. Ol «Keçpelek» kinofilminden «Duran ýerlere» atly eseri ýerine ýetirdi.
Aýbölek Muhyýewanyň we Seýran Atanýazowyň bilelikde Bahyň «Iki skripka üçin konsert» eserini ýerine ýetirmegi tomaşaçylarda ýakymly täsir galdyrdy. Jeren Gurbangylyjowanyň «Seni ýatlap» atly romansy diňleýjiler üçin garaşylmadyk sowgat boldy. Aýdym ýerine ýetirilenden soň diňe tomaşaçylar däl, eýsem aýdymçy Bahar Durdyýewa hem-de konsertde sazandarlyk eden Stella Faramazowa-da bu çykyş üçin öz hoşallyklaryny bildirdiler.
Aýdym-saz muşdaklary Türkmenistanyň halk artisti Wladimir Mkrtumowyň çykyşyny aýratyn bellediler. Ol diňleýjilere Raweliň iki eserini – «Pawana» we «Alborada graçioza» eserlerini hödürledi.
Konsert ähli aýdymçylaryň ýerine ýetirmeginde Çary Nurymowyň «Toý aýdymy» bilen tamamlandy. Aýdymçylardan Türkmenistanyň halk artisti Gülnar Nuryýewa hem-de Begenç Moşşyýew çykyş etdiler. Stella Faramazowa, Enejan Nuryýewa, Maýa Beýmanowa, Aşyr Aşyrow konsertde sazandarlyk etdiler.
Konsert konserwatoriýanyň ýerine ýetirijileriniň hem-de sazandalarynyň ussatlygynyň ýokary derejededigini ýene bir gezek görkezdi.
