Halkara parahatçylyk we ynanyşmak ýylyna bagyşlanan dürli derejeli dabaralardyr çäreler tutuş Diýarymyzda bolşy ýaly, Balkan welaýatynda hem giň gerime eýe bolýar.
Welaýat merkezi Balkanabat şäherindäki «Türkmeniň ak öýi» binasynda geçirilen bäsleşik hem şeýle gyzykly çäreleriň üstüni ýetirdi.Türkmenistanyň Bilim ministrliginiň, Türkmenistanyň Zenanlar birleşiginiň Merkezi geňeşiniň, Türkmenistanyň Kärdeşler arkalaşyklarynyň Milli merkeziniň, Türkmenistanyň Telewideniýe, radiogepleşikler we kinematografiýa baradaky döwlet komitetiniň «Hünärli nesil-röwşen geljek» diýen at bilen guraýan bu bäsleşiginiň Balkan welaýat tapgyry baý mazmuna, aýratyn ähmiýete beslendi. Bäsleşige welaýatyň orta mekdeplerinden göreldeli gyzlar gurnaklarynyň agzalary işjeň gatnaşdylar. Olar bäsleşigiň şertlerine görä, özleriniň taýýarlan el işlerini, şeýle-de Berkarar döwletiň täze eýýamynyň Galkynyşy döwrüniň milli gymmatlyklaryny, halkymyza eçilen bagtyýarlygyny çeper sözleriň, aýdymlardyr gazallaryň üsti bilen buýsançly beýan etdiler. Şonuň ýaly-da bäsleşigiň dowamynda dürli görnüşli el işlerini ýerine ýetirmekde, haly önümlerini dokamakda, saçaklary bezemekde ezberdiklerini görkezdiler.
Hünärli nesliň, ýaş zehinleriň «Bereketli türkmen saçagy» atly kitap esasynda tagamlaryň taýýarlanylyşy, olaryň ähmiýeti hakynda beren gürrüňleri gyzykly boldy. Milli tagamlaryň tarypynyň özara aýdyşyklar, nakyllar, gazallar arkaly ýetirilmegi bolsa bäsleşige gatnaşanlarda ýatdan çykmajak ýakymly täsirleri galdyrdy. Şeýle-de asylly maksatlary öňde goýan bäsleşikde öz ukypdyr başarnyklaryny görkezen hünärli gyzlar taryhy eýýamymyzda okamak, öwrenmek, döretmek, gurmak babatda döredip berlen döwrebap şertlerdir mümkinçilikler üçin Gahryman Arkadagymyza hem-de Arkadagly Gahryman Serdarymyza egsilmez alkyş, hoşallyk sözlerini aýtdylar.
Täsirli, şowhunly geçen bäsleşikde welaýatyň Bereket etrabyndaky 20-nji orta mekdebiň gyzlar gurnagynyň topary birinji orna mynasyp bolup, onuň döwlet tapgyryna gatnaşmaga hukuk gazandy. Ikinji, üçünji orunlary hem degişlilikde Balkanabat şäherindäki daşary ýurt dillerine ýöriteleşdirilen 3-nji orta mekdebiň, Gyzylarbat etrabyndaky 18-nji orta mekdebiň gyzlar gurnaklarynyň toparlary eýelediler. Ýeňijilere Hormat hatlary we ýadygärlik sowgatlary dabaraly ýagdaýda gowşuryldy.
