Türkmenistanyň Döwlet şekillendiriş sungaty muzeýinde heýkeltaraş Maksat Hojaýynow bilen suratkeş we grafikaçy Dilaram Hojaýynowanyň işleriniň şahsy sergisi açyldy.

Sergide dürli žanrlarda we ugurlarda döredilen işler görkezilýär. Olar türkmen sungat mekdebiniň baýlygyny we ýaş suratkeşleriň özüňi beýan etmegiň täze görnüşlerine bolan ymtylyşlaryny görkezýär. Suratkeşleriň eserlerini çuňňur ruhyýet, milli däp-dessurlara hormat goýmak we türkmen sungatynyň häzirki zaman ösüşini görkezmek islegi birleşdirýär.

Heýkeltaraş mekdebini dowam ediji Maksat Hojaýynow 1983-nji ýylda Ahal welaýatynda dogulýar. Ol Türkmen döwlet ýörite çeperçilik mekdebini, soňra bolsa Türkmenistanyň Döwlet çeperçilik akademiýasyny tamamlaýar. Ol ýerde tanymal ussatlar Saragt Babaýewden we Muhammet Ýüzbaşowdan bilim alýar. Bu gün Maksat akademiýanyň heýkeltaraşlyk bölüminde mugallym bolup işleýär we sergileredir bäsleşiklere işjeň gatnaşýar.

Ýaş heýkeltaraş öz işlerinde türkmen halkynyň gahrymançylygyny, ruhy mirasyny we döredijilik beýikligini wasp edýär. Onuň eserlerinde milli gahrymanlaryň, şahyrlaryň, sazandalaryň we bagşylaryň keşpleri aýratyn orun eýeleýär.

1989-njy ýylda Türkmenabatda doglan Dilaram Hojaýynowa türkmen suratkeşleriniň täze nesliniň wekilidir. Ol Türkmen döwlet ýörite çeperçilik mekdebinde we Türkmenistanyň Döwlet çeperçilik akademiýasynda suratçylyk ugrundan bilim aldy. Onuň işlerinde içki dünýäniň sazlaşygyny, mähri we ylhamy beýan edýän göze ýakymly öwüşginler agdyklyk edýär. Suratkeş usullardyr serişdeler bilen batyrgaý synag geçirýär we durmuş joşguny hem inçe reňk duýgusy bilen doly keşpleri döredýär.

Ugurlaryň heýkeltaraşlyk we surat çekmek ýaly dürlüligine garamazdan, Maksat bilen Dilaramyň eserleri içki sazlaşyk bilen birleşýär.

Maşgala döredijilik birleşigi suratkeşleriň täze nesli üçin ylham bolup hyzmat edýär we sungatyň jemgyýetiň ruhy ösüşiniň aýrylmaz bölegi hökmünde gymmatyny tassyklaýar. Ýaş suratkeşleriň şahsy sergisine ýekşenbe gününe çenli baryp bilersiňiz.