Türkmenistanly türgen Muhammedoraz Gulow Italiýanyň Wenesiýa welaýatynyň Adriatik kenarynda ýerleşýän Ýozolo kurort şäherinde tamamlanan karate boýunça 1-nji Ýaşlar ligasynyň halkara dünýä seriýasy ýaryşynda kümüş medal gazandy.

Bütindünýä Karate federasiýasynyň (WKF) howandarlygynda geçirilen bu ýaryşa 83 ýurtdan 3378 türgen gatnaşdy. Olar 12 ýaşdan 20 ýaşa çenli ýaş derejelerinde çykyş edip medallar ugrunda bäsleşdiler.

Türkmenistanyň Karatedo federasiýasynyň beren maglumatyna görä, biziň toparymyz ýaryşa 17 türgen bilen gatnaşdy.

Muhammedoraz Gulow kümüş medaly 14 ýaşa çenli ýetginjekleriň arasynda 40 kilograma çenli agram derejesinde çykyş edip gazandy. Finalda ildeşimiz ermeni karateçisi Norik Makarýandan 1:4 hasabynda ýeňildi we hormat münberiniň ikinji basgançagyna çykdy.

Muhammedoraz Gulow Mary welaýatynyň Baýramaly şäherindäki 1-nji orta mekdebiň 7-nji synpynda okaýar, karate bilen bolsa tälimçi Serdar Muhammetnazarowyň ýolbaşçylygynda meşgullanýar.

Türkmenistanyň Karatedo federasiýasynyň türgenleriniň karate boýunça 1-nji Ýaşlar ligasynyň dünýä seriýasynyň çäklerinde abraýly ýaryşlarda üstünlik gazanmagy ilkinji gezek däl. Geçen ýyl Aşgabat şäherindäki 61-nji orta mekdebiň okuwçysy Alymuhammet Kakalyýew Birleşen Arap Emirlikleriniň Fujaýra şäherinde we Ispaniýanyň La Korunýa şäherinde geçirilen karate boýunça 1-nji Ýaşlar ligasynyň ýaryşlarynda 14 ýaşa çenli ýetginjekleriň arasynda 55 kilograma çenli agram derejesinde çykyş edip iki gezek üçünji orny eýeledi, Ahal welaýatynyň Ak Bugdaý etrabynyň 16-njy orta mekdebiň okuwçysy Gurbannazar Amandurdyýew bolsa Birleşen Arap Emirlikleriniň Fujaýra şäherinde geçirilen ýaryşda 14 ýaşdan ýokary türgenleriň arasynda 52 kilograma çenli agram derejesinde çykyş edip bürünç medal gazandy.

Karate 2026-njy ýylyň 31-nji oktýabryndan 14-nji noýabryna çenli Senegalyň paýtagtynda geçiriljek we Afrikada geçirilýän ilkinji Olimpiýa oýunlary boljak 4-nji tomusky ýaşlar oýunlarynyň maksatnamasyna girizildi.