Daşary ýurtly ýazyjylaryň sahna eserleriniň hepdeliginiň çäklerinde Mary welaýatynyň Kemine adyndaky döwlet drama teatrynda «Söýginiň ýolunda» atly sahna oýnunyň ilkinji görkezilişi boldy.

Režisýor Ata Gullarowyň fransuz ýazyjysy Prosper Merimeniň «Afrika söýgüsi» atly eseri esasynda amala aşyran sahnalaşdyrmasy, nusgawy edebiýaty okap öwrenmäge bolan häzirki zaman çemeleşmesiniň mysalydyr.

Sahna oýny özüniň mazmunynyň çuňlugy we duýgulara baýlygy bilen tapawutlanýar, bu bolsa köp babatda özboluşly sahna oýnunyň bezegi hem-de inçeden işlenen sahna çözgütleri arkaly gazanylýar. Tomaşaçylara Gündogar ýurdunyň atmosferasyna aralaşmak teklip edilýär, şol ýerde ýyldyzly asmanyň astynda, ekzotik ösümlikli baglaryň arasynda, güýçli duýgular joşup we ykbal kesgitleýji çözgütler kabul edilýär.

Wakanyň merkezinde iki sany ganygyzgyn gahrymanyň bähbitleriniň çaknyşmagy durýar. Hajy Numan (K. Hanjaýew) öz dosty Zeýn (M. Bekmyradow) üçin alada edip, oňa karzyna pul berýär. Emma bu olaryň arasynda duýgy we namys meselesi sebäpli düşünişmezliklere getirýär. Umumy dil tapyp we biri-birine düşünip bilmän, olar köp ýyllyk dostlugyny ýitirýärler. Netijede, çaknyşyk zerarly bolup geçýän wakalaryň zynjyry pajygaly netijelere getirýär.

Prosper Merimeniň eseriniň hödürlenen bu täze düşündirmesi tomaşaçylara wakany täzeçe göz bilen görmäge mümkinçilik berdi. Bu sahna oýny diňe bir söýgi, dostluk we dönüklik hakynda däl. Ol şeýle hem güýçli duýgular we durmuş ýagdaýlaryň şertlerinde synagdan geçýän ahlagyň tebigaty hakda oýlanmaga itergi berýär.

Halkara Bitaraplyk gününe we Türkmenistanyň Bitaraplygynyň 30 ýyllygyna bagyşlanyp görkezilen sahna oýnunyň ilkinji görkezilişi türkmen jemgyýetiniň dünýä dramaturgiýasyna bolan durnukly gyzyklanmasyny görkezdi, şeýle hem medeni gepleşigiň we milli teatr sungatynyň gözýetimini giňeltmegiň ähmiýetini nygtady.