4 – 8-nji dekabr aralygynda Hytaý Halk Respublikasynyň Nankin şäherinde ýokary okuw mekdepleriň talyplarynyň arasynda nazary mehanika boýunça VI halkara olimpiadasy geçirildi. Ol Hohaý uniwersiteti tarapyndan guraldy.

Abraýly halkara gözden geçirilişine dünýäniň dürli ýurtlarynyň 66 uniwersitetinden 600-den gowrak talyp gatnaşdy.

Olimpiada ýurdumyzdan Türkmenistanyň Döwlet energetika institutynyň iki talyby – Dursunjemal Ataýewa hem-de Mähriban Azadowa gatnaşdylar.

Bäsleşigiň netijeleri boýunça talyplarymyzyň ikisi-de şahsy hasapda II orny we olimpiadanyň toparlaýyn hasabynda II orny eýelemegi başaryp, nazary mehanikany örän oňat bilýändiklerini hem-de ders boýunça ýokary taýýarlyk derejesini görkezdiler.

Talyplarymyzyň baýrakly orunlary halkara derejeli dürli bäsleşiklerde intellektual ukyplaryny işjeň we üstünlikli görkezýän Türkmenistanyň zehinli talyp ýaşlarynyň uly gazananlarynyň üstüni artdyrdy.

Abraýly bäsleşige Türkmenistandan gatnaşan talyplaryň gazanan ajaýyp netijeleri ýurdumyzda ýaşlaryň hemmetaraplaýyn ösmegine, olaryň zehinleriniň artmagyna we höweslendirilmegine, milli bilim ulgamynyň kämilleşdirilmegine hem-de bu ulgamda ileri tutulýan wezipeleriň çözülmegine neneňsi uly üns berilýändiginiň nobatdaky aýdyň subutnamasy boldy.