BMG-niň Ýewropa Ykdysady Komissiýasynyň hem-de Bütindünýä Saglygy Goraýyş Guramasynyň Ýewropa sebit wekilliginiň «Suw we saglyk meseleleri boýunça Teswirnamanyň iş maksatnamasyny amala aşyrmak arkaly suw üpjünçiligini, sanitariýany, gigiýenany we saglygy goraýşy gowulandyrmak» atly taslamasyny durmuşa geçirmegiň çäklerinde BMG-niň Aşgabatdaky binasynda milli mejlis geçirildi. Bu çäre Bütindünýä Saglygy Goraýyş Guramasynyň (BSGG) Türkmenistandaky Ýurt boýunça edarasy tarapyndan guraldy.

Çärä suw üpjünçiligi, sanitariýa, gigiýena we saglygy goraýyş (WASH) ulgamyndaky başlangyç maglumatlaryň seljermesiniň netijelerini ara alyp maslahatlaşmak üçin ministrlikleriň, hökümet edaralarynyň we halkara hyzmatdaşlaryň, şol sanda BSGG-niň, BMG-niň ÝYK-nyň we ÝUNISEF-iň wekilleri gatnaşdylar.

Mejlisiň dowamynda başlangyç maglumatlaryň seljermesiniň netijeleri baradaky hasabatlar diňlenildi, şeýle hem suw we saglygy goraýyş meseleleri boýunça Teswirnamanyň çäklerinde milli maksatlary kesgitlemek boýunça Belarus, Gazagystan we Özbegistan bilen tejribe alşyldy. Gatnaşyjylar gazanylan üstünlikleri, amala aşyrylýan taslamalaryň barşynda ýüze çykýan wezipeleri hem-de beýleki peýdalanýan ýurtlaryň tejribesinden alnan sapaklary jikme-jik ara alyp maslahatlaşdylar.

Halkara bilermenler Ýelena Drozdowa, Olga Mirşina we Žanar Mautanowa çykyş edip, halkara taslamalary durmuşa geçirmegiň tejribesi hem-de bu ugurdaky iň oňat amallar barada özara pikir alyşdylar.

Maslahatda Türkmenistanda suw üpjünçiligini, sanitariýany, gigiýenany we saglygy goraýşy gowulandyrmak boýunça mundan beýläk-de bilelikdäki çäreleri amala aşyrmagyň zerurlygyna aýratyn üns berildi. Bu bolsa ýurdumyzyň Durnukly ösüş maksatlaryna ýetmekde halkara standartlara ygrarlydygynyň nobatdaky subutnamasy boldy.

Çäräniň ahyrynda taraplar suw serişdeleri we saglygy goraýyş ulgamlarynda durnukly ösüşe ýetmek maksady bilen, geljekde hem tagallalary birleşdirmegiň möhümdigini nygtadylar.