Ýagşygeldi Kakaýew adyndaky Halkara nebit we gaz uniwersitetiniň talyby Leýla Şöhradowa hem-de Türkmen döwlet bedenterbiýe we sport institutynyň 2-nji ýyl talyby Amanmuhammet Hommadow Aşgabatda tamamlanan Türkmenistanyň Küşt federasiýasynyň (TKF) Gran-pri ýaryşynyň final tapgyrynyň ýeňijileri boldular.
Ýaryş 32 küştçini — açyk toparda 16 we zenanlaryň toparynda 16 küştçini jemläp, olar olimpiýa ulgamy boýunça bäsleşdiler. Ýaryşlar FIDE-niň halkara görkezijisiniň hasaplanmagy bilen geçirildi. Final tapgyrynyň ýeňijileri diňe bir abraýly orunlara däl, eýsem, ýaryşyň esasy baýraklaryna — 2026-njy ýylyň Türkmenistanyň Ýokary ligasyna göni ýollanmalara hem mynasyp boldular.
Leýla Şöhradowa goşmaça oýunlara (taý-breýklere) garaşman, zenanlaryň toparynda ynamly ýeňiş gazandy. Ol ähli garşydaşlaryny ýaryşyň esasy nusgawy görnüşinde ýeňmegi başardy, diňe ýarym finalda Jennet Ýalkanowa bilen bir gezek deňme-deň oýnady.
Kümüş baýraga Türkmen döwlet bedenterbiýe we sport institutynyň 4-nji ýyl talyby Ogulsuraý Baýrambaýewa mynasyp boldy. Ol finala çenli ynamly baryp, diňe ýarym finalda Gülmira Seýilhanowa tarapyndan güýçli garşylyga duş geldi we ony ýaryşyň rapid (çalt küşt) görnüşi boýunça goşmaça döwlerde ýeňmegi başardy.
Türkmenabat şäherindäki 41-nji ýöriteleşdirilen orta mekdebiň 12-nji synp okuwçysy G.Seýilhanowa ýaryşyň ähli tapgyrlarynda diýen ýaly özüniň tutanýerli häsiýetini görkezmeli boldy. Gülmira üçünji orun ugrundaky duşuşyga çenli baryp ýetdi we polat ýaly berk nerwleri arkaly ýeňiş gazandy. Sebäbi ol 1/8 finaldan başga ähli tapgyrlarda ýaryşyň nusgawy görnüşinde deň tamamlanmagy sebäpli ýaryşyň rapid we blis görnüşleri boýunça goşmaça döwlerde oýnamaly boldy. G.Seýilhanowa hemişe birinji ýaryşyň nusgawy görnüşinde utulyp, ertesi gün sanawy deňlemegi başardy (1/8 finaldan başga).
Amanmuhammet Hommadow açyk toparda ýaryşyň ynamly ýeňijisi boldy we 2026-njy ýylyň Türkmenistanyň Ýokary ligasyna gatnaşmaga hukuk gazandy. Köp sanly küşt bilermenleriniň pikirine görä, ol altyn medal ugrunda esasy dalaşgärleriň biri hasaplanar.
Kümüş medala Türkmenistanyň zenanlar milli ýygyndy toparynyň baş tälimçisi Şahruh Turaýew mynasyp boldy. Ol hem ýokary ussatlyk derejesini görkezip, diňe ýaryşyň ýeňijisinden asgyn geldi. Onuň tälimçi bolmagyna garamazdan, hünärmenler derejesindäki ýaryşlarda çykyş etmegini dowam etdirip, şägirtlerine sport ruhunyň, tutanýerliligiň we taýýarlygyň nusgasyny görkezmegi örän ähmiýetlidir.
Lebap welaýatynyň Dänew etrabyndaky 31-nji orta mekdebiň 11-nji synp okuwçysy Şageldi Gurbandurdyýew üçünji orun ugrundaky duşuşykda Azim Saryýewi ynamly ýeňip, bürünç medalyň eýesi boldy. Bu üstünlige barýan ýolda Şageldi çärýek finalda Gran-pri ýaryşynyň bäş saýlama tapgyrynyň üçüsinde ýeňiş gazanan Mergen Kakabaýewi garaşylmadyk ýagdaýda ýeňmegi başardy.
Türkmenistanyň Küşt federasiýasy tarapyndan şu ýyl ilkinji gezek durmuşa geçirilen «Gran-pri 2025» ýaryşy Türkmenistanda küşt oýnunyň ösmegi üçin strategik ähmiýete eýedir. Täze ýaryş ähli welaýatlardaky türgenlere başga şäherlere gitmezden, yzygiderli ýaryş tejribesini geçmäge mümkinçilik berýär, ýurdumyzyň güýçli küştçüleriniň dürli sebitlerde çykyş etmegine şertler döredýär we ýerli küştçüleriň bäsdeşlik ukybyny artdyrýar. Şeýle hem bu ýaryş ýaş zehinleri ir ýüze çykarmaga ýardam edýär we tejribeli türgenler üçin Türkmenistanyň Ýokary ligasyna saýlanmagyň netijeli guraly bolup hyzmat edýär.
