Türkmenistanyň bilim ulgamynyň wekilleri 25-nji ýanwardan 1-nji fewrala çenli Beýik Britaniýanyň we Demirgazyk Irlandiýanyň Birleşen Patyşalygynyň Kembrij şäherindäki Merkezi Aziýanyň ýokary okuw mekdepleriniň ýolbaşçy düzümi üçin niýetlenen hünär derejesini kämilleşdiriş okuwyna gatnaşýarlar.

Hünär derejesini kämilleşdiriş maksatnamasy bu taslama gatnaşýan ýurtlardaky uniwersitetleriniň ýolbaşçylary üçin Kembrij uniwersitetiniň Neşirýat we baha beriş bölümi bilen hyzmatdaşlykda işlenip düzülen Merkezi Aziýada iňlis dilini öwretmegiň hilini ýokarlandyrmak boýunça bilim taslamasynyň (AELLCA Phase II) çäginde amala aşyrylýar. Okuw PRESETT (Pre-Service English Teacher Тraining) maksatnamasynyň esasynda geçirilýär.

Saparyň ilkinji gününde Merkezi Aziýa ýurtlarynyň wekilleri okuw maksatnamasynyň açylyş dabarasyna gatnaşdylar.

Günüň dowamynda «PRESETT maksatnamasynyň çäginde iňlis dili özgertmelerine ýolbaşçylyk etmek» atly birinji sapak geçirildi. Oňa gatnaşanlar bilim täzeliklerini meýilleşdirmek we olaryň durmuşa geçirilmegine gözegçilik etmek meselelerini ara alyp maslahatlaşdylar. Mundan başga-da, uniwersitetiň Neşirýat we baha beriş bölümi tarapyndan amala aşyrylýan Kembrij uniwersitetiniň okuw maksatnamalaryny döwrebaplaşdyrmak we iňlis dilini giňden ornaşdyrmak boýunça iş tejribesi öwrenildi. Sapaga gatnaşanlar bu ugurlar boýunça öz bilim edaralaryndaky esasy wezipeleri bilelikde derňediler we olaryň netijeli çözgütlerini tapmaga gönükdirilen ileri tutulýan ugurlary kesgitlediler.

Türkmen wekiliýetiniň okuw saparynyň esasy maksady PRESETT ulgamynda dolandyryş we ýolbaşçylyk başarnyklaryny kämilleşdirmekdir. Mundan başga-da, maksatnama diňleýjileri iňlis dilini öwretmegiň täze usullary bilen tanyşdyrmaga, öňdebaryjy pedagogik çemeleşmeleri we mugallymlary taýýarlamak boýunça halkara tejribesini öwrenmäge, okuw maksatnamalaryny işläp düzmäge we baha beriş ulgamlarynda bilimlerini artdyrmaga, şeýle hem sanly tehnologiýalary we döwrebap okuw serişdeleriniň ulanylyşyny özleşdirmäge, bu ýerde gazanan tejribelerini Türkmenistanyň bilim ulgamyna ornaşdyrmak mümkinçiliklerini derňemäge gönükdirilipdir.

Milli bilim ulgamynyň wekilleriniň Kembrije okuw sapary dowam edýär.