Türkmenistanyň Zenanlar birleşiginiň Merkezi geňeşiniň we Türkmenistanyň Kärdeşler arkalaşyklarynyň Milli merkeziniň Halkara zenanlar güni mynasybetli bilelikde yglan eden «Hünärim bar – hormatym bar» atly bäsleşiginiň Lebap welaýat tapgyry geçirildi.
Türkmenabat şäherinde ýerleşýän «Bagt köşgünde» geçirilen bu bäsleşige welaýatyň ähli künjeginden deslapky tapgyrda ýeňiji bolan çeper elli zenanlaryň onlarçasy gatnaşdy. Berkarar döwletiň täze eýýamynyň Galkynyşy döwründe ata Watanymyzyň okgunly ösüşlerine saldamly goşant goşýan zenanlarymyzyň eziz enelerimizden nesillere miras galan amaly-haşam sungatyny, milli nagyşlarymyzyň inçe syrlaryny, tikinçilik sungatyny ilat arasynda ýaýmak, el hünäriniň ussatlarynyň baý iş tejribesini açyp görkezmek, zenanlarymyzyň hünär ussatlygyny kämilleşdirmek, zähmet adamlarynyň ýaş nesillere görkezýän göreldesini wagyz etmek maksady bilen geçirilen bäsleşigiň şertlerine görä oňa gatnaşyjy zenanlar üç şert boýunça özara bäsleşdiler.
Örän täsirli, milli öwüşgine beslenip geçen bäsleşigiň 1-nji şerti boýunça oňa gatnaşyjylar türkmen halkynyň Milli Lideriniň hem-de hormatly Prezidentimiziň parasatly baştutanlygynda ýurdumyzda ýetilýän belent sepgitler, zenanlarymyzyň hünär öwrenmekligi, erkin zähmet çekmekligi, telekeçilik işleri bilen meşgullanmaklary, amaly-haşam işleri bilen gyzyklanmaklary üçin döredilýän giň mümkinçilikler, şeýle hem öz zähmet çekýän kärhanalary, bu ýerlerde işleýän tikinçi zenanlar, ýaşlaryň arasynda el işlerini wagyz etmek boýunça alyp barýan işleri barada çeper dilde buýsanç bilen gürrüň berdiler.
Bäsleşigiň 2-nji şertine görä tikinçi zenanlar otuz minudyň dowamynda 6 – 7 ýaşly gyzjagaz üçin köýnegi biçmek we tikmek boýunça bäsleşdiler. Şeýle hem bu şertde bäsleşige gatnaşýan çeper elli zenanlar halkymyzyň milli lybaslarynyň görnüşlerini, olara salynýan nagyşlaryň syrlaryny we olaryň tikilişini çeper beýan etdiler. Bäsleşigiň üçünji şerti boýunça oňa gatnaşyjylar amaly-haşam sungatynyň gadymy nusgalaryndan ugur alyp, bagtyýar zamanamyza laýyk özleriniň tiken we nagyşlan döwrebap eşiklerini geýip, milli lybaslaryny görkezdiler hem-de milli gymmatlyklarymyzy goşgy setirleriniň, rowaýatlaryň we gazallaryň üsti bilen wasp etdiler.
Bäsleşigiň jemi boýunça Garabekewül etrabyndaky çagalar we ýetginjekler öýüniň gurnak ýolbaşçysy Şirin Salyhowa 1-nji, Farap etrabyndaky 20-nji orta mekdebiň mugallymy Jeren Hojakulyýewa we Dänew etrabyndaky 32-nji orta mekdebiň mugallymy Ogulsoltan Ýaraşowa degişlilikde 2-nji we 3-nji orunlara mynasyp boldular. Ýeňijiler bäsleşigiň guramaçylary tarapyndan sowgatlar bilen sylaglandy hem-de bu bäsleşigiň döwlet tapgyryna gatnaşmaklyga hukuk gazandylar.
