«Garaşsyz, baky Bitarap Türkmenistan ̶ bedew batly at-myradyň mekany» ýylynda Balkan welaýatynda guralýan tasirli çärelerdir dabaralar barha giň gerime eýe bolýar. Şeýle bäsleşikleriň biri-de Halkara zenanlar gününe bagyşlanyp, Günbatar sebitiň merkezi Balkanabat şäherindäki «Türkmeniň ak öýi» binasynda geçirildi.
Türkmenistanyň Zenanlar birleşiginiň Merkezi geňeşiniň hem-de Kärdeşler arkalaşyklarynyň Milli merkeziniň «Hünärim bar ̶ hormatym bar» diýen at bilen bilelikde yglan eden bäsleşiginiň Balkan welaýat tapgyry ýatdan çykmajak ýakymly, gyzykly pursatlara baý boldy. Tikinçilik bilen yzygiderli meşgullanýan gelin-gyzlaryň arasynda welaýat möçberinde geçirilen bäsleşige onuň deslapky etrap-şäher tapgyrlarynyň ýeňijileri gatnaşdylar. Olar bäsleşigiň Düzgünnamasyna laýyklykda, üç şert boýunça özara bäsleşdiler.
Berkarar döwletiň täze eýýamynyň Galkynyşy döwründe nesillerimize ene-mamalarymyzdan miras galan amaly-haşam sungatyny, milli nagyşlaryň inçe syrlaryny, tikinçilik sungatyny, el işlerini ýaýmak, hünär ussatlygyny görkezmek, zähmet adamlarynyň ösüp gelýän ýaş nesillere göreldesini wagyz-ündew etmek maksady bilen geçirilen bu bäsleşik oňa gatnaşyjylaryň şowhunly, dowamly el çarpyşmalary bilen alkyşlandy. Bäsleşigiň dowamynda ellerinden dür dökülýän ökde tikinçileriň taýýarlan milli lybaslarynyň, nagyşlarynyň görkezilişi guraldy. Şeýle-de bu bäsleşige gatnaşanlar taryhy eýýamymyzda döredijilikli zähmet çekmäge, hünär ussatlygyny ýüze çykarmaga, gurmaga döredip berýän ajaýyp şertleridir mümkinçilikleri üçin türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza özleriniň çäksiz alkyşlarydyr hoşallyklaryny beýan etdiler. Bäsleşige gatnaşyjylaryň nepis gymmatlyklar, şol sanda milli lybaslardyr nagyşlar, tikin sungaty hakynda beren gürrüňleri, aýdan rowaýatlarydyr tymsallary, goşgulary, ýerine ýetiren gazallary-da tomaşa edenlerde ýatdan çykmajak täsirleri galdyrdy.
Gyzykly bäsleşikde bäsdeşler bellenilen wagt aralygynda gyzjagazlara köýnek biçmek, tikmek babatda hem ezberliklerini görkezdiler. Şonuň ýaly-da nusgalyk biçüwdäki milli egin-eşikleri özboluşly, owadan nagyşlar bilen bezemekde toplan tejribelerini, hünär ussatlyklaryny oňa gatnaşyjylar bilen paýlaşdylar.
Özboluşly baýramçylyk ruhunda geçen bäsleşigiň jemi jemlenende, welaýatyň Balkanabat şäherindäki daşary ýurt dillerine ýöriteleşdirilen 3-nji orta mekdebiň mugallymy Oguljeren Rejebowa, Esenguly etrabyndaky 6-njy orta mekdebiň mugallymy Gülzar Baýramowa hem-de Bereket etrabyndaky ýöriteleşdirilen 19-njy orta mekdebiň mugallymy Nurjemal Täçmämmedowa ýeňiji bolup, bäsleşigiň döwlet derejesinde geçiriljek jemleýji tapgyryna gatnaşmaga hukuk gazandylar. Bäsleşigiň ýeňijilerine hem-de oňa ähli gatnaşyjylara bolsa guramaçylar tarapyndan sowgatlar dabaraly ýagdaýda gowşuryldy.
