Aşgabatda uly sport çäresi, ýagny çagalaryň we ýetginjekleriň arasynda geçirilen Küşt boýunça Türkmenistanyň çempionaty tamamlandy. 72 medal ugrunda dowam eden ýaryşlaryň ahyrky oýunlary rapid we blis usulynda geçirildi. Ozal nusgawy görnüşinde geçirilen ýaryşyň ýeňijileri kesgitlendi.

Üç ugurda – nusgawy küştde, rapidde we blisde şeksiz öňdeligi görkezen türgenler:

16 ýaşa çenli toparda lebaply Jahan Rejebowa we 14 ýaşa çenli toparda «Küşt Älemi» küşt akademiýasynyň okuwçysy Nurana Söýünowa aýratyn ykrara mynasyp boldular.

Aşgabadyň Ýöriteleşdirilen küşt we şaşka mekdebiniň wekili Aly Ahmedow hem nusgawy küştde we rapidde altyn medal gazanmak bilen, özüniň ýokary ussatlygyny tassyklady.

Ýaryşyň görnükli üstünlikleriniň arasynda toparynyň «gapjygyna» iki altyn medal getiren Mary welaýatyndan Jennet Ýalkanowanyň we çempionatyň üç kümüş medalyny gazanan Lebap welaýatyndan Mähri Agamyradowanyň netijeleri-de bellendi.

Ähli ugurlaryň netijelerine görä, umumy toparlaýyn hasapda birinji orny Lebap welaýatynyň topary eýeledi. Baýraklaryň sany boýunça ikinji orun Mary welaýatynyň wekillerine ýetdi. Üçünji orna «Küşt Älemi» akademiýasy bilen Aşgabadyň Ýöriteleşdirilen küşt we şaşka mekdebi deň şärik boldy.

Çempionatyň üstünlikli geçirilmegi ýurdumyzyň küşt mekdebiniň mümkinçilikleriniň artýandygyny görkezdi. Ýaryşlaryň netijeleri ýurtda çagalar we ýetginjekler sportuny ösdürmek we Türkmenistanyň sebitlerinde türgenleriň yzygiderli taýýarlygyny kämilleşdirmek üçin alnyp barylýan döwlet syýasatynyň netijelidigini tassyklaýar.