«Magtymguly Pyragy» medeni-seýilgäh toplumynda özbek halkynyň beýik şahyry, akyldary we döwlet işgäri Alyşir Nowaýynyň ýadygärligine gül goýmak dabarasy boldy.
Beýik nusgawy şahyryň doglan gününiň 585 ýyllygy mynasybetli guralan çäre diplomatik wekilhanalaryň wekillerini bir ýere jemledi. Dabara gatnaşyjylar ýadygärlige çemenleri we gül desselerini goýdular.
Dabarada çykyş eden Özbegistan Respublikasynyň Türkmenistandaky Adatdan daşary we Doly ygtyýarly ilçisi Rawşanbek Alimow şahyryň hatyrasynyň özara ynanyşmagyň, parahatçylygyň we mirasa bolan sarpanyň ähmiýetini ebedi ýatladýandygyny belledi. Özbek edebi diliniň düýbüni tutujy hökmünde Alyşir Nowaýynyň türki dilleriň ösmegine ägirt uly goşant goşandygy nygtaldy.
Ilçi pursatdan peýdalanyp Alyşir Nowaýynyň mirasyna goýulýan uly sarpa üçin hem-de paýtagtymyzyň medeni-seýilgäh toplumynda şahyryň ýadygärliginiň dikilendigi üçin Türkmenistanyň Prezidenti Serdar Berdimuhamedowa we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa tüýs ýürekden hoşallyk bildirdi.
Çäräniň dowamynda Alyşir Nowaýy bilen türkmen halkynyň beýik şahyry Magtymguly Pyragynyň arasyndaky ruhy yzygiderlilige aýratyn üns berildi. Magtymguly Pyragy Alyşir Nowaýyny özüniň ruhy halypasy hasaplapdyr we öz eserlerinde türki halklaryň medeniýetleriniň hem-de dilleriniň bitewüliginiň nyşanyny görüp, ýygy-ýygydan onuň pähim-paýhasyna ýüzlenipdir. Bu baglanyşygyň subutnamasy hökmünde, milli lybasly çagalar Alyşir Nowaýynyň meşhur şygyrlaryndan bölekleri okadylar. Şeýle hem Ýer ýüzüniň ähli adamlaryny dostlukda we agzybirlikde ýaşamaga çagyrýan taryhda öçmejek setirler ýaňlandy.
Şanly sene mynasybetli çäreler Döwletmämmet Azady adyndaky Türkmen milli dünýä dilleri institutynda dowam etdi. Ol ýerde mugallymlar we talyplar şahyryň döredijiliginiň pelsepewi we ynsanperwerlik ugurlaryny ara alyp maslahatlaşdylar. Şeýle hem Türkmenistanyň Bazar Amanow adyndaky Döwlet çagalar kitaphanasynda döredijilik duşuşyklary geçirildi.
Türkmenistanda Alyşir Nowaýynyň döredijiligine uly sarpa goýulýar. Nusgawy şahyryň ynsanperwerlik we ahlak kämilligi baradaky pikirleri şu günki gün hem öz ähmiýetini saklap, türkmen-özbek dostlukly gatnaşyklaryny berkitmekde ygtybarly binýat bolup hyzmat edýär. Geçirilen çäreler iki goňşy döwletiň arasyndaky dostluk gatnaşyklarynyň pugtadygyny we ruhy gymmatlyklaryň umumylygyny ýene bir gezek tassyklady.
