Durmuş syýasaty döwlet ugrunyň üýtgewsiz ileri tutulýan ugry bolup galýar. 13-nji fewralda geçirilen Ministrler Kabinetiniň giňişleýin mejlisiniň dowamynda hormatly Prezidentimiz Serdar Berdimuhamedow «Türkmenistany 2026-njy ýylda durmuş-ykdysady taýdan ösdürmegiň we maýa goýum Maksatnamasynyň» görkezijilerini hödürledi. Bu Maksatnama ulanmaga beriljek durmuş maksatly desgalaryň sany boýunça rekord derejä ýeter.

«Türkmenistany 2026-njy ýylda durmuş-ykdysady taýdan ösdürmegiň we maýa goýum Maksatnamasyna» laýyklykda, şu ýylda umumy meýdany 900 müň inedördül metrden gowrak ýaşaýyş jaýlaryny ulanmaga bermek meýilleşdirilýär. Bilim düzümini ösdürmäge aýratyn üns berildi. Täze okuw mekdepleri 3 müň 380 okuwçyny kabul eder, şeýle hem 1 müň 80 orunlyk mekdebe çenli çagalar edaralary gurlar.

Türkmenistanyň paýtagtynyň keşbi mundan beýläk-de gözelleşer. Şu ýyl Aşgabat şäheriniň «Parahat – 7» ýaşaýyş toplumynda 30 sany ýaşaýyş jaýynyň hem-de köp sanly söwda we hyzmatlar öýleriniň, Büzmeýin etrabyndaky ýaşaýyş jaý toplumynda 46 sany döwrebap ýaşaýyş jaýynyň, paýtagtymyzda 127 sany iki gatly kottej görnüşli ýaşaýyş jaýynyň we 4 müň orunlyk köpugurly medeni merkeziniň gurluşygyny tamamlamak meýilleşdirilýär.

Paýtagtymyzda birbada birnäçe ýokary tehnologiýaly desgalaryň açylmagy bilen saglygy goraýyş ulgamy hem täze itergi alar. Şeýlelikde, Aşgabatda Halkara pediatriýa merkezi, Halkara onkologiýa ylmy-kliniki merkezleri we Stomatologiýa merkezi ulanmaga berler.

Mundan başga-da, ýurdumyzyň meşhur şypahanasy bolan «Arçman» şypahanasynyň mümkinçilikleri giňeler. Bu ýerde 400 orunlyk täze binalar toplumy açylar. Bu bolsa has köp sanly raýatlarymyza oňaýly şertlerde saglyklaryny dikeltmäge mümkinçilik berer.