Türkmenistanyň Telekommunikasiýalar we informatika instituty ýurdumyzyň ýokary okuw mekdepleriniň talyplarynyň arasynda geçirilen «AI Solutions» («EA çözgütleri») hakaton bäsleşiginiň ýeňijilerini yglan etdi. Bäsleşik ýokary okuw mekdep tarapyndan guraldy.
Bäsleşik 21-nji fewralda Türkmenistanyň Telekommunikasiýalar we informatika institutynyň ýanynda hereket edýän «Sanly Çözgüt – IT meýdança» hojalyk jemgyýetiniň binýadynda geçirildi. Hakaton bäsleşigine talyplardan ybarat toparlaryň 16-sy (her ýokary okuw mekdepden bir) gatnaşdy.
Bäsleşige gatnaşyjylar emeli aňy, esasan-da, ulanyjynyň derejesine laýyklykda sowallary düzüp hem-de alnan jogaplaryň esasynda netijelere baha berip bilýän test geçirmek ulgamyny ulanmak arkaly IT-önümleri işläp taýýarlamak boýunça ýaryşdylar.
Bäsleşige gatnaşanlaryň innowasion çözgütleriniň netijeliligine we iş görkezijilerine ygtyýarly eminler baha berdiler. Eminler topary ýokary okuw mekdepleriň emeli aň dersleri boýunça mugallymlaryndan hem-de bu ulgam boýunça çagyrylan bilermenlerden ybarat boldy.
Hakaton bäsleşiginiň jemleri boýunça I orny Türkmenistanyň Inžener-tehniki we ulag kommunikasiýalary institutynyň, Türkmenistanyň IIM-niň institutynyň hem-de Ýagşygeldi Kakaýew adyndaky Halkara nebit we gaz uniwersitetiniň toparlary eýelediler. II orun Halkara ynsanperwer ylymlary we ösüş uniwersitetiniň, Türkmen döwlet binagärlik-gurluşyk institutynyň we Magtymguly adyndaky Türkmen döwlet uniwersitetiniň toparlaryna berildi. Türkmen döwlet ykdysadyýet we dolandyryş institutynyň, S.A.Nyýazow adyndaky Türkmen oba hojalyk uniwersitetiniň, Döwletmämmet Azady adyndaky Türkmen milli dünýä dilleri institutynyň hem-de Türkmenistanyň Döwlet energetika institutynyň toparlary III orna mynasyp boldular.
Ýeňijiler Türkmenistanyň Telekommunikasiýalar we informatika institutynyň diplomlary we ýadygärlik sowgatlary bilen sylaglandylar. Ýurdumyzyň birnäçe beýleki ýokary okuw mekdepleriniň toparlarynyň 6-syna höweslendiriji baýraklar berildi.
Talyplaryň hakaton bäsleşigi talyplaryň arasynda sanly ulgam boýunça sowatlylyk derejesini artdyrmak, ýaş hünärmenleriň emeli aň tehnologiýalaryny ulanmak ukyplaryny ösdürmek, ýokary hilli emeli aň taslamalaryny işläp düzmek we döretmek hem-de olary täjirleşdirmek mümkinçiliklerine baha bermek maksady bilen geçirildi.
Guramaçylaryň belleýişleri ýaly, bäsleşik emeli aň tehnologiýalaryny başarnykly we netijeli ulanyp bilýän has zehinli ýaşlary ýüze çykarmaga, şeýle hem emeli aňyň kömegi bilen ýönekeý we çalt çözgütleri tapmaga hem-de topar bolup sazlaşykly işläp bilmek ukyplaryny ösdürmäge mümkinçilik berdi.
