Türkmenistanyň Prezidenti nebitgaz pudagyny ösdürmek boýunça strategiýany durmuşa geçirmegiň çäklerinde tebigy gazyň çykarylyşyny düýpli artdyrmaga gönükdirilen Karara gol çekdi. Bu resminama «Türkmengaz» döwlet konserniniň «Galkynyş» gaz käniniň dördünji tapgyryny özleşdirmegi düzgünleşdirýär.

Karara laýyklykda «Türkmengaz» döwlet konserni Hytaýyň «CNPC Amudarya Petroleum Company Ltd.» kompaniýasy bilen şertnama baglaşar. Taslama ýylda 10 milliard kub metr harytlyk gazyny taýýarlaýan desganyň we şol bir möçberde harytlyk gazy taýýarlamak üçin ýeterlik boljak ulanyş guýularynyň taslamasyny we gurluşygyny öz içine alýar.

Bu çäre döwletiň energiýa kuwwatyny pugtalandyrmakda we gaz pudagynda halkara hyzmatdaşlygyny giňeltmekde möhüm ädim bolar.