Häzirki zaman dünýäsinde ählumumy söwda giňişligine goşulyşmak ykdysady ösüşiň esasy şerti bolup durýar. Türkmenistanyň öňünde nähili mümkinçilikleriň açylýandygy we Bütindünýä Söwda Guramasyna (BSG) goşulyşmak işiniň häzirki tapgyry barada Halkara söwda merkeziniň (HSM) Gündogar Ýewropa we Merkezi Aziýa bölüminiň ýolbaşçysy Ýelena Butrimowa «Altyn asyr» elektron gazetiniň habarçysy bilen bolan söhbetdeşliginde gürrüň berdi.
Bilermeniň pikirine görä, Türkmenistan diňe bir nebitgaz pudagynda däl, eýsem beýleki ugurlarda hem örän uly açylmadyk mümkinçiliklere eýedir. Halkara söwda merkezi esasy ünsüni oba hojalygyny we gaýtadan işleýän senagaty goldamaga gönükdirýär.
«Türkmenistanyň mümkinçilikleri çäksizdir. Ýurduň azyk önümleriniň eksportyny ep-esli artdyrmak üçin ähli şertleri bar» diýip, Ý.Butrimowa belledi.
Şeýle-de bolsa, bilermen Ýewropa Bileleşigi ýaly geljegi uly bolan bazarlara çykmak üçin berk kadalaryň berjaý edilmelidigini aýtdy.
«Bu ugurdaky işleriň esasy ugurlary iki düzgüni öz içine alýar. Birinjisi – ÝB-niň hil standartlaryna laýyk gelmekdir, bu türkmen öndürijileri üçin ileri tutulýan ugurdyr. Ikinjisi – sarp edijileriň isleglerini öwrenmekdir. Türkmenistanyň köpsanly önümçilik meýdançalary eýýäm Ýewropada isleg bildirilýän harytlaryň giň görnüşini öndürýär, indi diňe logistikany dogry ýola goýmak galýar» diýip, HSM-niň wekili nygtady.
Ý.Butrimowanyň bellemegine görä, dokma önümlerine aýratyn orun degişlidir. Pagtanyň ýokary hili we önümçilikleriň döwrebaplaşdyrylmagy netijesinde, türkmen dokma önümleri şu günki gün dünýä derejesinde durnukly islegden peýdalanýar.
Aşgabadyň Bütindünýä Söwda Guramasyna agza bolmak baradaky maksady iň takyk ädimleriň biridir. Ý.Butrimowa munuň yzygiderliligi we düzümleýin özgertmeleri talap edýän köptaraply işdigini aýtdy. Bellenilişi ýaly, taryhy tejribe ýurtlaryň köpüsinde agza bolmak üçin arza berlen pursadyndan doly hukukly agzalyga çenli 15 – 20 ýyl wagt gerekdigini görkezýär. Muňa garamazdan, Türkmenistanyň Hökümetiniň anyk garaýşy bu ugurdaky meýilleriň çynlakaýdygyna şaýatlyk edýär.
«Aşgabat bu meselede öňdengörüjilikli çemeleşme görkezýär. Gurama agza bolmagyň milli ykdysadyýete iň ýokary peýdany getirmegi üçin ähli inçe pursatlar, şertler we mümkinçilikler jikme-jik seljerilýär. Amallaryň dowamlylygyna garamazdan, men netijäniň oňyn boljakdygyna ynanýaryn we ýakyn geljekde Türkmenistan Bütindünýä Söwda Guramasynyň doly hukukly agzasy bolar» diýip, HSM-niň bilermeni ynam bildirdi.
Halkara söwda merkezi we Bütindünýä Söwda Guramasy bilen hyzmatdaşlyk Türkmenistana ählumumy söwda ulgamynda täze we uly mümkinçilikleri açýar. Tebigy baýlyklaryň, gaýtadan işleýän senagatyň ösüşiniň we dünýäniň hil standartlaryna eýermek baradaky taýýarlygyň utgaşmagy ýurduň ykdysady taýdan üstünlikli özgermegi üçin ygtybarly binýat bolup hyzmat edýär diýip, HSM-niň bölüminiň ýolbaşçysy sözüni jemledi.
