24 – 28-nji mart aralygynda Türkmenistanyň Döwlet energetika institutynda Türkmenistanyň we daşary ýurtlaryň ýokary okuw mekdepleriniň talyplarynyň arasynda nazary mehanika dersi boýunça V Açyk halkara internet olimpiadasy geçirildi.
Şu ýyl olimpiada Türkmenistandan, Russiýadan, Belarusdan, Özbegistandan, Gazagystandan, Gyrgyzystandan, Azerbaýjandan, Hytaýdan, Rumyniýadan, Saud Arabystanyndan, Kambojadan, Hindistandan, Günorta Sudandan, Türkiýeden, ABŞ-dan, Wýetnamdan we Malaýziýadan 120-den gowrak ýokary okuw mekdebine wekilçilik edýän 760-dan gowrak zehinli talyp gatnaşdy.
Gatnaşyjylar şahsy bäsleşikde 292 we toparlaýyn ýaryşda 60 sany baýrakly orun ugrunda bäsleşdiler.
Şahsy bäsleşiklerde ýurdumyzyň ýokary okuw mekdepleriniň talyplary 68 baýrakly orna: 12 birinji, 15 ikinji we 41 üçünji orunlara mynasyp boldular. Şeýle hem türkmen talyplary toparlaýyn hasapda ýene-de 15 baýrakly orny (2 sany birinji, 4 sany ikinji we 9 sany üçünji orun) eýelediler.
Daşary ýurtly gatnaşyjylaryň arasynda şahsy birinjilikde 224 ýeňiji we baýrak eýesi kesgitlenip, olara 11 sany birinji, 68 sany ikinji we 145 sany üçünji orun berildi. Toparlaýyn ýaryşlarda daşary ýurtly talyplar 45 orny eýelediler: 9 sany birinji, 15 sany ikinji we 21 sany üçünji orun. Olimpiadada Russiýanyň we Hytaýyň ýokary okuw mekdepleriniň talyplary aýratyn tapawutlanyp, olar iň köp baýrakly orunlary gazandylar.
Olimpiadanyň ýapylyş dabarasynyň dowamynda ýeňijilere we baýrak eýelerine degişli derejeli diplomlar hem-de Türkmenistanyň Döwlet energetika instituty tarapyndan sowgatlar gowşuryldy.
Olimpiadanyň meýdançasynda dürli hünärleriň we okuw ýyllarynyň talyplary öz bilimlerini, ukyplaryny we zehinlerini görkezdiler. Bäsleşik gatnaşmaga isleg bildirýän Türkmenistanyň we daşary ýurtlaryň ähli ýokary okuw mekdepleriniň talyplary üçin açyk boldy.
Şahsy hasapda gatnaşyjylar üçin nazary mehanikanyň bölümleri boýunça 8 mesele taýýarlanyldy. Olaryň ikisi statika we kinematika bölümlerine, galan dördüsi bolsa dinamika bölümine degişli boldy. Meseleleri çözmek üçin 240 minut wagt berildi. Toparlaýyn bäsleşigiň gatnaşyjylaryna nazary mehanikanyň şol bölümleri boýunça 5 meseläni 60 minudyň dowamynda çözmek teklip edildi.
Türkmenistanyň ýokary okuw mekdebi tarapyndan her ýyl geçirilýän ders olimpiadasy talyplaryň arasynda dostlukly gatnaşyklary berkitmek we özara bilim alyşmak, olaryň döredijilik we ylmy işjeňligini höweslendirmek, sanly sowatlylygy, ýaşlaryň özbaşdak işlemek ukyplaryny ösdürmek, şeýle hem professor-mugallymlaryň we talyplaryň gatnaşmagynda bilelikdäki ylmy çekişmeleri guramak üçin nobatdaky netijeli meýdança öwrüldi.
Guramaçylaryň belleýşi ýaly, bu olimpiada bolan gyzyklanma yzygiderli artýar. Bu bolsa talyplaryň takyk ylymlary öwrenmäge bolan höwesiniň, täze bilimlere, açyşlara, ylymdaky döwrebap tehnologiýalary özleşdirmäge bolan ymtylmalarynyň, umuman, ýaşlaryň barha artýan we berkeýän mümkinçilikleriniň subutnamasydyr.
