«18 ýyl – 18 üstünlik». 6-njy aprelde Türkmenistanyň Daşary işler ministrliginiň Halkara gatnaşyklary institutynda ýokary okuw mekdebiň esaslandyrylan gününiň 18 ýyllygy mynasybetli geçirilen tanyşdyrmalar bäsleşigi şeýle atlandyryldy.
Halkara hukugy fakultetiniň talyplarynyň arasynda geçirilen bäsleşigi institutyň halkara hukugy we deňeşdirme hukuk öwrenişi kafedrasynyň «Ýaş hukukçylar» ylmy gurnagynyň wekilleri guradylar.
Çäräniň çäklerinde talyplaryň ýokary okuw mekdebiň döreýiş we ösüş ýoluna bagyşlanan gyzykly we şowhunly tanyşdyrmalary geçirildi.
Çykyşlarda ýokary okuw mekdebiniň işiniň möhüm ugurlaryna aýratyn üns berildi. Geljekki hukukçylar halkara hyzmatdaşlygy, hususan-da, DIM-iň HGI-niň öňdebaryjy daşary ýurt ýokary okuw mekdepleri hem-de abraýly halkara guramalar bilen strategik gatnaşyklary ösdürişi baradaky meseleleri giňişleýin beýan etdiler.
Tanyşdyrmalaryň awtorlary diňleýjilere ýokary okuw mekdebiň toplan ylym-bilim kuwwaty, okatmagyň innowasion tehnologiýalarynyň we usulyýetleriniň işjeň ornaşdyrylyşy, akademiki görkezijileriň depginli ösüşi barada gürrüň berdiler.
Şeýle hem ýokary okuw mekdebiň işiniň iň ýokary görkezijileri hökmünde onuň talyplarynyň hem-de uçurymlarynyň gazanan üstünlikleri üns merkezinde boldy.
Görkezilen tanyşdyrmalar ýokary mekdebiň gysga taryhy döwür, ýöne, yhlasly, ýokary hilli zähmet we onuň mynasyp netijeli bilen doly bolan 18 ýylda geçen ýoly barada aýdyň hem-de mazmunly beýanata öwrüldi.
Institutda ähmiýetli çäräniň geçirilmegi oňa gatnaşyjylara diňe bir köpçüligiň öňünde çykyş etmek we ýokary hilli wideoşekilleri taýýarlamak başarnyklaryny görkezmäge däl, eýsem özleriniň ýokary okuw mekdepleriniň alyp barýan işiniň hem-de ýurdumyzyň daşary syýasat strategiýasynyň möhüm maksatlaryna we ähmiýetine düşünmeklerini berkitmäge mümkinçilik berdi.
