Türkmenistanly mekdep okuwçylar Moskwada 15 – 23-nji aprel aralygynda geçirilen himiýa dersi boýunça 60-njy halkara Mendeleýew olimpiadasyna gatnaşyp, üstünlik gazandylar.

Olimpiadanyň netijeleri boýunça Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynda bilim alýan okuwçylar iki kümüş we iki bürünç medala eýe bolmagy başardylar. Iki kümüş medala Rüstem Jumaýew we Diýar Döwletow, iki bürünç medala bolsa Aýlar Orunowa we Pälwan Ilmämmedow eýe boldular.

Okuwçylaryň gazanan üstünlikleri mynasybetli Türkmenistanyň Bilim ministrligi biziň ýeňijilerimize gymmat bahaly sowgatlary gowşurmak maksady bilen dabaraly çäre geçirdi.

Ýokary derejede alnyp barlan bu halkara bäsleşige 37 döwletden 200 okuwçy gatnaşdy. Okuwçylar nazary bilimler we tejribe işlerini geçirmek boýunça bäsleşdiler.

Mendeleýew olimpiadasy täze alym-himik nesliň döremegi we himiýa biliminiň giňden meşhurlyk gazanmagyny esasy maksat edinmek bilen mekdep okuwçylarynyň arasynda himiýa dersi boýunça dünýä derejesinde geçirilen möhüm bäsleşikleriň biri bolup durýar.

Türkmen okuwçylarynyň şeýle ýokary derejede geçirilen olimpiadada gazanan ýeňşi milli bilimiň ýokary hilini, ýaşlarymyzyň intellektual başarnygyny, has ýokary derejelerine ýetmek islegini, ýurdumyzyň ylym we akademiýa tarapdan dünýäde abraýyny berkitmek üçin alnyp barylýan işleriň ýene bir subutnamasy boldy.