Türkmenistanyň Beýik Saparmyrat Türkmenbaşy adyndaky şekillendiriş sungaty muzeýinde Nyýazmyrat Dowodowyň doglan gününiň 105 ýyllygy mynasybetli şahsy sergisi açyldy. Türkmenistanyň sungatda at gazanan işgäri watandaşlarymyz üçin baý döredijilik mirasyny galdyrdy. Muzeýde guralýan mowzuklaýyn sergileriň köpüsiniň onuň eserleri bilen bezelmegi munuň aýdyň subutnamasydyr. Şol sebäpli hem, ýubileý sergisinde nakgaşlyk sungatynyň muşdaklaryna tanyş bolan ençeme eserler ýerleşdirilipdir.
Şahsy sergileriň özboluşly aýratynlygy bar: olar arkaly awtoryň dünýägaraýşyna, içki dünýäsine göz ýetirip bolýar. Mysal üçin, N.Dowodowyň öz ýurduna wepaly hakyky watançy bolandygyny ynamly aýtmak bolar. Onuň suratlary türkmen halkynyň durmuşynyň özboluşly ýyl ýazgysydyr. Nakgaşyň eserlerinde öküze, düýä, hatda eşege goşulan azaldan başlap («Şeýle bolupdy» suraty), mehaniki azala («Başlangyç» suraty), sorujy beketlere we Garagum kanalynyň gurluşygyna çenli taryhy menziller janlanýar. Zehinli nakgaş eli albomly, arkasy molbertli gurluşygyň tozanly ýollarynda aýlanyp, her bir pursady kagyza geçiripdir. Ol gurluşyklary beýan edýän görnüşleri täsirli we owadan bermegi başarypdyr.
«Meniň Watanym» atly suraty kolhoz meýdanlarynyň reňkleriniň terligi, Garagum kanalynyň mawy zolagy we uzakdan geçip barýan demir ýol düzümi bilen tomaşaçyny haýran galdyrýar. Bu eser muzeýiň iň meşhur we ýygy-ýygydan sergilenýän işleriniň biridir.
Nyýazmyrat Dowodow 1921-nji ýylda dünýä inipdir. Uruş ýyllarynda ol Türkmen döwlet çeperçilik mekdebini tamamlapdyr. Şonuň üçin hem, uruş temasy onuň döredijiliginiň aýrylmaz bölegine öwrüldi. Nakgaş ömrüniň ahyryna çenli uruş weteranlarynyň portretler toplumynyň üstüni ýetirip geldi. Onuň kitaplar we gwozdika gül çemeni şekillendirilen «Weterana sowgat» atly natýurmorty bolmazdan uruş temasyndaky hiç bir sergini göz öňüne getirip bolmaz.
Aýratyn diwarlykda Dowodowyň lukmançylyk temasyna degişli eserleri görkezilýär. Olaryň arasynda «Oba hassahanasy» atly işi has-da meşhurdyr. Ak halatly ynsanlar islendik pursatda adamlara kömege ýetmäge taýýar bolan mert adamlardyr. Nakgaşyň galamy olary janaýamazakly hünärmenler hökmünde görkezýär.
Dowodowy döredijilik adamlary – zergärler, sazandalar hem hemişe özüne çekipdir. Ol öz eserlerinde olaryň keşbini örän takyklyk bilen şekillendiripdir. Şeýlelikde, ol tomaşaçylara watandaşlarymyzyň dürli öwüşginli keşplerden ybarat uly galereýasyny hödürledi.
Ussat nakgaş 1987-nji ýylda aradan çykdy. Eger ykbal oňa şu günleri görmegi nesip eden bolsa, onuň suratlarynda paýtagtymyzyň döwrebap binalary janlanardy, portretler galereýasy bolsa täze hünär eýeleri – diplomatlar, telekeçiler bilen baýlaşardy. Ol bu keşpleri hem şol bir ak ýüreklilik we uly zehin bilen dörederdi. Emma ynsan öz ýaşaýan döwrüni saýlap bilmeýär.
