Türkmenistandaky Fransuz instituty küşt möwsüminiň açylýandygyny yglan edýär. Türkmenistanyň Küşt federasiýasy bilen bilelikdäki taslamanyň çäklerinde institutyň binýadynda küşt kluby öz işine başlaýar. Klubyň esasy maksady bu intellektual sport görnüşini wagyz etmekden ybaratdyr.

Klubyň ilkinji duşuşygy 9-njy maýda geçiriler. Okuw-türgenleşikler yzygiderli ýagdaýda her şenbe güni sagat 18:30-da institutyň çäginde geçiriler. Gatnaşmak tölegsizdir.

Taslama giň köpçülige niýetlenip, dürli derejedäki oýunçylaryň tejribe alyşmagyna mümkinçilik döredýän meýdançany emele getirmegi maksat edinýär. Klubyň işiniň esasy ugurlary şulardan ybarat:

• Amaly sapaklar: dostlukly oýunlary geçirmek we oýun strategiýalaryny seljermek.

• Okuw: täze başlanlar üçin tejribeli halypalaryň kömegi göz öňünde tutulýar. Olar küşt oýnunyň esasy düzgünlerini we usullaryny öwretmäge ýardam bererler.

• Inklýuziwlik: taslama taýýarlyk derejesine garamazdan, ilatyň ähli gatlaklaryny çekmäge gönükdirilendir.

Fransuz dilini bilmek makullanýar, emma kluba goşulmak üçin hökmany şert däldir. Ähli gyzyklanma bildirýänler gatnaşmaga çagyrylýar.