Mary şäherinde dürli ýaşdaky we dürli mümkinçilikli adamlary birleşdiren «Çäksiz göçüm» atly ilkinji inklýuziw şaşka ýaryşy geçirildi.

Çäräni «Däp-Dessur» hojalyk jemgyýeti «Bold» we «Däp» kompaniýalarynyň goldawynda gurady. Bu çäre Bütindünýä Saglygy Goraýyş Guramasy tarapyndan maý aýynda yglan edilen Mental saglyk aýyna bagyşlanyp, jemgyýetde durmuş abadançylygy goldamaga we özara medeni gatnaşyklary pugtalandyrmaga gönükdirildi.

Ýaryşa 40-dan gowrak adam gatnaşdy. Olaryň arasynda çagalar, ýaşlar, ýaşulular, şeýle hem maýyplygy bolan adamlar, şol sanda görüş taýdan mümkinçiligi çäkli adamlar we maýyplar arabasyny ulanýanlar bar. Çäräniň esasy maksady deň mümkinçilikleriň, janly gatnaşyklaryň we intellektual sport arkaly adamlary birleşdirmegiň meýdançasyny döretmekden ybarat boldy.

Gatnaşyjylar 9 tapgyrdan ybarat şweýsar ulgamy boýunça bäsleşdiler. Bu ulgam olara dürli taýýarlyk derejesindäki garşydaşlar bilen birnäçe oýun oýnamaga mümkinçilik döredip, ýaryşy has gyzykly we dinamiki ýagdaýa getirdi.

Günüň dowamynda ýaryş meýdançasynda mähirli we hormat ýagdaýy höküm sürdi. Şaşka tagtalarynyň başynda dürli nesilleriň wekilleri duşuşdylar – mekdep okuwçylary tejribeli uly ýaşly oýunçylar bilen güýç synanyşdylar, dartgynly duşuşyklaryň arasynda bolsa gülki, goldaw sözleri we dostlukly söhbetdeşlikler eşidildi.

Guramaçylar şaşkanyň diňe bir intellektual ýaryş bolman, eýsem aragatnaşyk gurmagyň, durmuş taýdan uýgunlaşmagyň we ruhy abadançylygy pugtalandyrmagyň möhüm serişdesine öwrülendigini nygtadylar.

«Iň esasy ýeňiş – dürli ýaşdaky we dürli mümkinçilikli adamlaryň bir ýere jemlenip, birek-birek bilen aragatnaşyk edip, biri-birini goldamagy boldy» diýip, çäräniň guramaçylary bellediler.

Ýeňijiler we ýörite baýraklara mynasyp bolan gatnaşyjylar medallar hem-de diplomlar bilen sylaglanyldy. Şeýle-de ähli gatnaşyjylara şahadatnamalar we ýadygärlik sowgatlary gowşuryldy.