«Molla Nasreddin – gara günüňde hemdem» atly halkara çeper film türki halklaryň umumy gymmatlyklaryny we gadymdan gelýän paýhasyny degişmeler arkaly açyp görkezýär. Filmiň edebi esasyny ýazan we ony goýan režissýor Azerbaýjanyň halk artisti Wagif Mustafaýew. Režissýoryň aýtmagyna görä, Molla Nasreddin diňe bir degişme ýa ýomak bolman, eýsem, jemgyýetiň derdine çeper seslenmäniň nyşanydyr, şonuň üçin bu keşbi ekrana geçirmek biziň üçin uly jogapkärçilik we ahlak borjumyzdyr.
Taslama 2023-nji ýylyň oktýabr aýynda Azerbaýjan Respublikasynyň Şuşa şäherinde geçirilen Türki dünýäsiniň 1-nji medeniýet forumynyň çäginde TÜRKSOÝ-a agza ýurtlaryň medeniýet ministrleriniň Hemişelik geňeşiniň 40-njy mejlisinde kabul edildi. Guramanyň howandarlygynda amala aşyrylýan bu giň gerimli kino taslamasy azerbaýjanly, türkiýeli, özbegistanly, gazagystanly, gyrgyzystanly we türkmenistanly kinoçylary birleşdirýär.
Ýaňy-ýakynda Türkmenistanda «Molla Nasreddin – gara günüňde hemdem» filminiň nobatdaky tapgyry surata düşürildi. Surata düşüriliş ýurdumyzyň gözel ýerlerinde – Ahal welaýatynyň Gäwers obasynda we Bokurdak şäherçesinde geçirildi. Bu ýerler Molla Nasreddiniň başdan geçirmelerini aňrybaş anyk beýan edýän tebigy gözelliklerinden ötri saýlanyp alyndy. Bu ýerde Garagum sährasynyň ümmülmez giňişliginde gadam urýan kerwenli sahnalar surata düşürildi.
Emma mundan öň täze filmi döredýänler dürli ýaşdaky we milletdäki sahna ussatlaryny saýlamak üçin, birnäçe seçim geçirdiler. Gysga, ýöne örän täsirli keşp üçin görk-görmekli, ýaraşykly at çapmaga ezber ýaş ýigit gerekdi. Munda Türkmen döwlet medeniýet institutynyň teatr sungaty bölüminiň ikinji ýyl talyby Şageldi Salyhow saýlanyp alyndy.
Şageldi Salyhow şu döwür ýaşlarynyň janly wekilidir. Ol 2021-nji ýylda Türkmenistanyň Prezidentiniň yglan eden «Türkmeniň Altyn asyry» atly döredijilik bäsleşiginde ýeňiji boldy. 2022-nji ýylda Şageldi Türkmenistanyň ýaşlar baýragyny gazandy, 2025-nji ýylda bolsa ýaşlar ylmy işleriniň milli bäsleşigine gatnaşdy. Häzirki wagtda onuň ady diňe bir ýurdumyzda däl, eýsem, Russiýada we Belarusda hem şahyrlaryň we ýazyjylaryň arasynda tanalýar. Ýaşlygyna garamazdan, Şageldi Salyhowyň inçe lirika ýugrulan goşgulary «Sura», «Sewero-Muýa çyraglary», «Edebi tanyşlyklar» we «Metamorfozalar» žurnallarynda çap edildi.
«Molla Nasreddin – gara günüňde hemdem» filmini döretmek boýunça halkara taslama geljekki dramaturg Şageldi Salyhowa özüniň aktýorlyk ukybyna göz ýetirmäge mümkinçilik berdi.
Şageldiniň aýtmagyna görä, ol bu keşbe derrew giripdir. Elbetde, ilkinji gezek kameranyň öňünde durup, režissýoryň tabşyryklaryny ýerine ýetirmek aňsat däl. Emma bu taslama gatnaşýan meşhur türkmen aktýorlary Çary Seýitliýew we Döwletgeldi Berdiýew ilkinji gezek çykyş edýän ýigidi goldapdyrlar.
Oguz han adyndaky «Türkmenfilm» birleşiginiň işjeň goldawy bilen amala aşyrylan bu iş halkara hünärmenler toparynyň sazlaşykly hereketi netijesinde üstünlikli tamamlandy. Köpçülikleýin sahnalara döredijilik ugurlarynda okaýan talyplar gatnaşdylar. Ýurdumyzyň baý taryhy binagärligi we tebigy gözelligi Gündogaryň halk akyldarynyň başdan geçirmelerine özboluşly çuňluk berdi.
Bu film adaty kino sungatynyň çäklerinden çykmak bilen, biziň ýurtlarymyzy birleşdirýän güýçli medeni köprä öwrülýär. Film «Nasreddin Production MMC» kompaniýasy tarapyndan TÜRKSOÝ-a agza ýurtlaryň Medeniýet ministrlikleriniň goldawy bilen döredilýär. «Molla Nasreddin – gara günüňde hemdem» filmi, şübhesiz, türki halklaryň medeni mirasyny halkara derejesinde wagyz etmäge uly goşant goşar.
