Türkmenistanly ýaş türgen Alihan Nurýagdyýew Gazagystanyň Aktobe şäherinde 25–30-njy maý aralygynda geçirilen abraýly «Aktobe Masters 10&Under GA Road to TOP 8» halkara tennis ýaryşynda birbada iki altyn medal gazanyp, halkara tennis sahnasynda özüni üstünlikli tanatdy.
Bu ýaryşa 10 ýaşa çenli oglanlaryň we gyzlaryň hersinden 96 türgen gatnaşdy. Olar dürli ýurtlardan we sebitlerden gelen iň güýçli ýaş tennisçilerdi. Güýçli bäsdeşlige we kiçi ýaşyna garamazdan, bary-ýogy 8 ýaşly Alihan ýekelikde-de, jübütleýin oýunda-da ynamly we kämil oýun görkezmegi başardy.
Ýekelikdäki ýaryşda 60-njy belgi bilen çykyş eden türkmen tennisçisi ähli duşuşyklary üstünlikli geçip, finalda Gazagystandan bolan bäşinji belgili G. Istomini 4:1, 4:2 hasabynda ýeňip, çempion boldy.
Alihan jübütleýin ýaryşda hem üstünlikli çykyş etdi. Ol Gazagystanyň Atyrau şäherinden bolan tennisçi Nawid Sabyrow bilen bilelikde çykyş edip, ýene-de bir altyn medala mynasyp boldy.
Bu ýaryş Alihan Nurýagdyýew üçin halkara derejedäki ilkinji çykyş boldy. Şeýle-de bolsa, ýaş türgen tennis meýdançasynda ýokary ussatlyk, özüne ynam we hakyky sport häsiýetini görkezdi. Bu bolsa tälimçileriň we tomaşaçylaryň ünsüni çekdi.
Ýaş çempion Aşgabat şäherine wekilçilik edýär we tälimçiler Ýuriý Rogusskiý hem-de Meýlis Orazmuhammedowyň ýolbaşçylygynda türgenleşýär. Şeýle hem Alihan A.S. Puşkin adyndaky bilelikdäki türkmen-rus orta mekdebinde okaýar we okuwda hem ýokary netijeleri gazanyp, «Okuwda gazanan ajaýyp üstünlikleri üçin» diýen minnetdarlyk haty bilen sylaglandy.
Ýaşynyň kiçidigine garamazdan, tennisçi eýýäm birnäçe çagalar ýaryşlaryna gatnaşyp, Türkmenistanda 8 ýaşa çenli türgenleriň arasynda geçirilen bäsleşiklerde baýrakly orunlary eýeläpdi. Hünärmenler onuň zähmetsöýerligini, tertipliligini we uly geljeginiň bardygyny aýratyn belleýärler.
Alihan Nurýagdyýewiň Aktobedäki ýeňşi diňe bir ýaş türgeniň şahsy üstünligi bolman, eýsem soňky ýyllarda işjeň ösüp, halkara arenasynda barha köp üstünlik gazanýan türkmen tennis sporty üçin hem möhüm üstünlik boldy.
