30-njy maýdan 5-nji iýun aralygynda Türkmenistanyň Telekommunikasiýalar we informatika institutynyň wekilleri Swikkau şäherindäki (Germaniýa) Günbatar-Sakson amaly ylymlary uniwersitetinde iş saparynda bolýarlar.
Türkmen ýokary okuw mekdebiniň wekiliýeti Germaniýanyň akademiki alyşmalar gullugynyň (DAAD) goldamagynda Swikkau uniwersiteti tarapyndan guralan uçurymlaryň hepdeligine gatnaşýar.
Dünýäniň dürli ýurtlarynyň ýokary okuw mekdepleriniň wekillerini bir ýere jemlän iri halkara çäresi ýokary bilim ulgamynda tejribe alyşmak, akademiki hyzmatdaşlygy ösdürmek hem-de uzakmöhletleýin halkara gatnaşyklary ýola goýmak üçin meýdançadyr.
Uçurymlaryň hepdeliginiň açylyş dabarasy 1-nji iýunda Germaniýanyň uniwersitetiniň merkezi toplumynyň baş maslahat zalynda geçirildi. Ýokary okuw mekdebiň rektory, professor, inženerçilik ylymlarynyň doktory Ştefan Kassel çäräni açyp, oňa gatnaşyjylara gutlag sözi bilen ýüzlendi.
Hepdeligiň baý maksatnamasy halkara taslamalaryny durnukly dolandyrmak we ikitaraplaýyn diplom maksatnamasyny işläp taýýarlamak, durnukly ösüş ýörelgelerini ylma we bilime ornaşdyrmak, döwrebap bilim mikrokwalifikasiýalary işläp taýýarlamak, şeýle hem bilimi sanly görnüşe öwürmek baradaky meseleler bilen birlikde giň ugurlary ara alyp maslahatlaşmagy özünde jemledi.
Çärä gatnaşyjylar üçin gyzykly gezelençler guralyp, olaryň dowamynda myhmanlar «Ubineum» başarnyklar merkezine hem-de Günbatar-Sakson uniwersitetiniň täze tehnologik merkezine baryp gördüler, şeýle hem ýokary okuw mekdebiň ylym-bilim binýady bilen giňişleýin tanyşdyryldy.
Türkmen wekiliýetiniň Swikkau uniwersitetiniň rektory bilen geçirilen ýörite duşuşygy saparyň esasy wakasy boldy.
Gepleşikleriň barşynda ýokary okuw mekdepleriň arasynda oňyn ikitaraplaýyn hyzmatdaşlygyň netijelerine garadylar hem-de ony geljekde ösdürmegiň ileri tutulýan ugurlaryny maslahatlaşdylar. Bilelikdäki ylmy-barlag we bilim taslamalaryny durmuşa geçirmek, mugallymlary we talyplary alyşmak, akademiki ykjamlylyk maksatnamasyny ösdürmek, şeýle hem telekommunikasiýalar, maglumat howpsuzlygy we sanly tehnologiýalar ulgamynda hyzmatdaşlygy pugtalandyrmak boýunça anyk meýilnamalar kesgitlenildi.
Garaşsyzlyk ýyllarynda bilim ulgamynda Türkmenistanyň gazananlaryna aýratyn üns berildi. Işleriň netijeliligi nygtalyp, şolaryň netijesinde häzirki günde ýurtda berk häzirkizaman ylym-bilim binýady kemala getirildi.
Türkmenistanda bilimi sanly görnüşe öwürmek, şol sanda sanly platformalary, milli bilim ulgamyny hil taýdan täze derejä çykarmaga ýardam berýän häzirkizaman maglumat tehnologiýalaryny we okatmagyň innowasion usullaryny ornaşdyrmak boýunça amala aşyrylýan iri möçberli taslamalar barada maglumat berildi.
Günbatar-Sakson uniwersitetiniň rektory Türkmenistanyň Telekommunikasiýalar we informatika institutynyň hünärmenleri taýýarlaýyş derejesine ýokary baha berdi hem-de hyzmatdaşlygy geljekde giňeltmäge gyzyklanma bildirdi. Duşuşygyň netijesinde özara gatnaşyklary dowam etmek we çuňlaşdyrmak, şeýle hem bilelikde täze bilim we ylmy başlangyçlary işläp taýýarlamak barada ylalaşyk gazanyldy.
Türkmenistanyň Telekommunikasiýalar we informatika instituty bilen Swikkaunyň Günbatar-Sakson amaly ylymlary uniwersitetiniň arasynda netijeli özara bähbitli hyzmatdaşlyk ýokary okuw mekdepler tarapyndan ikitaraplaýyn hyzmatdaşlyk etmek hakynda gol çekilen Ähtnamanyň esasynda 2016-njy ýyldan bäri alnyp barylýar.
