Türkmenistanyň Balkan welaýatynda Medeniýet hepdeligini geçirmek boýunça giň gerimli taýýarlyk işleri alnyp barylýar. Guramaçylyk işleriniň barşy hormatly Prezidentimiz Serdar Berdimuhamedow tarapyndan sanly ulgam arkaly geçirilen Ministrler Kabinetiniň nobatdaky mejlisinde ara alnyp maslahatlaşyldy.

Bu mesele boýunça Ministrler Kabinetiniň Başlygynyň orunbasary B. Seýidowa hasabat berdi. Wise-premýer bu giň gerimli medeni çäräniň Medeniýet we sungat işgärleriniň, şeýle hem Magtymguly Pyragynyň şygryýet güni mynasybetli geçirilýändigini aýtdy. Döredijilik forumy 22 — 27-nji iýun aralygynda geçiriler.

Medeniýet hepdeliginiň çäklerinde sungatyň we çeper döredijiligiň dürli ugurlaryny öz içine alýan giň maksatnama göz öňünde tutulýar. Hususan-da, Balkanabat şäherindäki «Türkmeniň ak öýi» binasynda forumyň açylyş we ýapylyş dabaralary geçiriler. Şeýle hem maksatnama aýdym-saz çykyşlaryny, ylmy-amaly maslahatlary, sergileri, döredijilik duşuşyklaryny, edebi agşamlary, kino görkezilişlerini we sahna eserlerini öz içine alýar.

Mundan başga-da, çäreleriň geçirilýän günlerinde öň yglan edilen döredijilik bäsleşikleriniň jemleri jemlener. Magtymguly adyndaky Milli sazly drama teatrynda gatnaşyjylar we myhmanlar üçin «Leýli we Mejnun» operasy görkeziler.

Hormatly Prezidentimiz Serdar Berdimuhamedow medeniýet ulgamyny ösdürmäge, milli mirasy gorap saklamaga we ony dünýäde giňden wagyz etmäge döwlet tarapyndan uly ähmiýet berilýändigini nygtady. Döwlet Baştutanymyz hünär baýramçylygyna bagyşlanan döredijilik çäreleriniň ýurdumyzyň medeni durmuşynda uly ähmiýete eýedigini belläp, wise-premýere Medeniýet hepdeliginiň ýokary guramaçylyk derejesinde geçirilmegini üpjün etmegi tabşyrdy.