“Garaşsyz, baky Bitarap Türkmenistan — bedew batly at-myradyň mekany” ýylynyň taryhy ähmiýeti bolan wakalarynyň üstüni ýetiren Medeniýet hepdeliginiň çäklerinde sungatyň, çeper döredijiligiň dürli görnüşlerini öz içine alýan köp sanly medeni çäreler ýaýbaňlandyryldy. Medeniýet we sungat işgärleriniň hem-de Magtymguly Pyragynyň şygryýet güni mynasybetli guralýan medeni-köpçülikleýin çärelerde ýurdumyzyň ähli ugurlar boýunça gazanýan ösüşleri, halkymyzyň ruhy dünýäsi öz beýanyny tapýar.
Medeniýet hepdeliginiň her ýylda geçirilmegi ýurdumyzda medeniýetiň, sungatyň hem-de edebiýatyň ösdürilmegi ugrunda döwlet derejesinde edilýän tagallalaryň oňyn netije berýändigini aýdyňlygy bilen äşgär edýär. Bu çäre milli medeniýetimizi ösdürmekde, ýaş zehinleri ýüze çykarmakda möhüm ähmiýete eýedir.
Şu gün ir bilen Medeniýet hepdeligine gatnaşýan döredijilik işgärleri Hazar deňzinde gämili gezelenç etdiler. Munuň özi soňky ýyllarda tanalmaz derejede özgeren “Awaza” milli syýahatçylyk zolagynyň gözel görnüşini we bu künjegiň tebigy aýratynlyklaryny, gojaman deňziň giňişliklerini synlamak üçin ajaýyp mümkinçilik boldy. Medeniýet we sungat işgärleri ýurdumyzda çeper döredijiligi hemmetaraplaýyn ösdürmäge we täze sungat hem-de çeper eserleri döretmäge gönükdirilen şertler üçin Gahryman Arkadagymyza we Arkadagly Gahryman Serdarymyza çuňňur hoşallyklaryny beýan etdiler.
Balkan welaýatynda geçirilýän Medeniýet hepdeliginiň köpöwüşginli çäreleri welaýatyň Taryhy we ülkäni öwreniş muzeýinde dowam etdi. Bu ýerde ýurdumyzyň suratkeşleriniň “Sungat gözelligi — ylham çeşmesi” atly şekillendiriş we amaly-haşam sungatynyň eserleriniň sergisi ýaýbaňlandyryldy. Ýurdumyzyň suratkeşleriniň dürli ugurlar boýunça döreden eserleri bu ýerde guralan serginiň täsirli pursatlara baý bolmagyny şertlendirdi. Sergä gatnaşyjylar özboluşly suratlary we amaly-haşam sungatynyň eserlerini synlap, çeper döredijilige gol beren döredijilik işgärleriniň zehininden dörän işleriň ýokary baha mynasypdygyny nygtadylar. Munuň özi türkmen suratkeşleriniň döredýän eserleriniň häzirki zaman talaplaryna laýyk gelýändiginiň we sungat eserlerinde halkymyzyň bagtyýar durmuşynyň, döredijilikli zähmetiniň hem-de milli medeniýetiň dürli ugurlarynyň nusgalyk derejä eýediginiň nobatdaky subutnamasyna öwrüldi.
“Türkmennebit” döwlet konserniniň nebiti gaýtadan işleýän zawodlar toplumynyň Türkmenbaşydaky medeni-sport toplumynda çagalar döredijilik toparlarynyň çykyşlary guraldy. Balkan welaýatynyň çagalar döredijilik toparlarynyň “Bagtyýar nesilleriň owazy” atly aýdym-sazly çykyşlary çärä gatnaşyjylarda ýatdan çykmajak täsirleri galdyrdy. Bu bolsa ýurdumyzda sungat ussatlarynyň täze nesliniň kemala gelýändiginiň aýdyň nyşanydyr. Şeýle hem bu ýerde medeniýet we sungat ulgamy boýunça baý tejribe toplan sungat ussatlarynyň ýaş nesiller bilen duşuşygy geçirildi. Bu sungat älemine aralaşýan we çeper döredijilige gol beren ýaşlar üçin ähmiýetli waka boldy. Sungat ussatlary körpe artistlere özleriniň iş we durmuş tejribeleri barada gürrüň berdiler.
Medeniýet hepdeliginiň nobatdaky güni dürli ugurlary öz içine alýan medeni-köpçülikleýin çärelere baý boldy. Hepdeligiň maksatnamasynda duşuşyklara we beýleki çärelere giň orun berildi. Ýurdumyzyň şahyrlarynyň deňziň kenarynda aýdyşyk görnüşindäki çykyşlary has-da täsirli boldy. Bu çäre döredijilik işgärleriniň göwnüni galkyndyryp, olary täze, döwrebap eserleri döretmäge ruhlandyrdy.
Türkmen halkynyň köpasyrlyk medeniýeti we sungaty, bagşyçylyk däpleri jemgyýetde agzybirligiň we ruhy sazlaşygyň berkarar bolmagyny esasy ugur edinýär. Bagşy-sazandalaryň çykyşlarynda hut şu ugra degişli asylly ýörelgeler öz beýanyny tapdy. Türkmenbaşy etrabynyň Belek şäherçesindäki Medeniýet öýünde ýurdumyzyň bagşy-sazandalarynyň “Ol şirwan perdäňe galsana, bagşy!” atly konserti hepdeligiň esasy wakalarynyň birine öwrüldi. Bu ýerde türkmen halkynyň taryhyň dowamynda we häzirki döwürde hem netijeli ulanylýan milli saz gurallarynyň sergisi guraldy. Munuň özi kaşaň binada geçirilen baýramçylyk dabarasynyň derejesiniň we ähmiýetiniň belende galmagyny üpjün etdi. Sergä gatnaşyjylar bagşy-sazandalaryň çykyşlaryna uly höwes bilen tomaşa etdiler. Olar halk aýdym-sazlarynyň çeperçilik derejesine, bagşylaryň ýerine ýetirijilik ussatlygyna ýokary baha berdiler.
Balkan welaýatynda geçirilýän Medeniýet hepdeliginiň çäklerinde guralýan çärelerde ýurdumyzda hormatly Prezidentimiziň we Gahryman Arkadagymyzyň yzygiderli tagallalary netijesinde durmuşa geçirilýän beýik işler, milli medeniýetimiziň we sungatymyzyň ýeten derejesi, dürli ugurlar boýunça gazanylýan üstünlikler öz beýanyny tapdy. Bu sungat ussatlarynyň öňde goýlan wezipeleriň üstünlikli ýerine ýetirilmegi ugrunda edýän tagallalarynyň oňyn netije berýändigini görkezýär.
Ýurdumyzyň mukaddes Garaşsyzlygynyň 35 ýyllygy giňden bellenilýän ýylda geçirilýän Medeniýet hepdeliginiň çäklerinde guralýan aýdym-sazly dabaralar, tans we folklor toparlarynyň, teatr artistleriniň çykyşlary çäreleriň many-mazmun taýdan baýlaşmagyny şertlendirýär. Şunuň bilen baglylykda, ýurdumyzyň dürli künjeklerinde hereket edýän teatrlar ajaýyp sahna eserleri bilen halkymyzyň şatlygyna şatlyk goşýarlar. Balkan welaýatynda geçirilýän Medeniýet hepdeliginiň çäklerinde ýurdumyzyň halk teatrlarynyň arasynda guralan “Şadyýan şahandazlar” atly döredijilik bäsleşiginiň jeminiň jemlenmegi taryhy pursatlaryň üstüni ýetirdi.
Balkan welaýatynyň Beýik Saparmyrat Türkmenbaşy adyndaky döwlet drama teatrynda halk teatrlarynyň arasynda geçirilen döredijilik bäsleşiginiň ýeňijileri sylaglanyldy. Onuň dowamynda saýlap alan hünärine söýgüsi çäksiz bolan artistleriň döreden keşplerine, ussatlyk derejesine mynasyp baha berildi. Bellenilişi ýaly, halk teatrlarynyň işgärleriniň taryhy şahsyýetleriň keşbini döretmegiň aýratynlyklary boýunça usuly maslahaty bäsleşigiň esasy ugurlarynyň biridir. Ajaýyp keşpleri janlandyryp, ýokary baha mynasyp bolan artistler ýurdumyzda çeper döredijiligiň, teatr sungatynyň döwrüň talabyna laýyk derejede kämilleşdirilmegi ugrunda yzygiderli tagalla edýän Gahryman Arkadagymyza we Arkadagly Gahryman Serdarymyza çuňňur hoşallyklaryny beýan etdiler. Bäsleşigiň jemini jemlemek we ýeňijileri sylaglamak dabarasy tamamlanandan soňra, bu ýerde “Ene wesýeti” atly sahna oýny görkezildi. Sahna eserine gatnaşýan artistler özlerine ynanylan keşpleri ussatlyk bilen janlandyryp, oýnuň örän täsirli bolmagy ugrunda ukyp-başarnyklaryny gaýgyrman, hünär ussatlygyny görkezdiler. Tomaşaçylaryň şowhunly el çarpyşmalary teatr artistleriniň yhlasyndan dörän sahna oýnuna berlen ýokary baha hökmünde kabul edildi. Ýurdumyzyň halk teatrlarynyň işgärleri milli medeniýetiň we sungatyň hak howandary Gahryman Arkadagymyzyň hem-de Arkadagly Gahryman Serdarymyzyň tagallalary netijesinde döredilýän mümkinçiliklerden netijeli peýdalanyp, türkmen sungatyny dünýä giňişligine çykarmak ugrunda mundan beýläk-de ähli tagallalaryny gaýgyrmajakdyklaryna ynandyrdylar.
Medeniýet we sungat işgärleriniň hem-de Magtymguly Pyragynyň şygryýet güni mynasybetli geçirilýän Medeniýet hepdeliginiň çäklerinde guralýan her bir çäre artistleriň, aýdym-saz we folklor toparlarynyň ýurdumyzyň durmuşynda bolup geçýän möhüm wakalary beýan edýän çykyşlaryna beslenýär. Bu bolsa medeniýet işgärleriniň ýurdumyzyň sazlaşykly ösüşine mynasyp goşant goşýandyklaryny görkezýär.
Türkmenbaşy etrap medeniýet merkezinde ýurdumyzyň Garaşsyzlygynyň 35 ýyllygy hem-de 2026-njy ýylyň “Garaşsyz, baky Bitarap Türkmenistan — bedew batly at-myradyň mekany” ýyly diýlip yglan edilmegi mynasybetli “Arkadagly Watanymyz — dillerde dessanymyz” atly döredijilik duşuşygy geçirildi. Oňa gatnaşyjylar häzirki döwürde milli medeniýetiň, çeper döredijiligiň hemmetaraplaýyn ösdürilmegi ugrunda edilýän aladalaryň netijesinde, milli döredijilik ulgamynyň ösüşiň täze derejesine çykarylýandygyny bellediler. Şeýle hem duşuşykda çeper döredijiligiň häzirki ösüşi, oňa täzeçil usullary we dünýäniň ösen tejribesini ornaşdyrmak bilen baglanyşykly meseleler ara alnyp maslahatlaşyldy. Munuň özi çeper döredijiligiň baý many-mazmunyny açyp görkezmekde we onda halypa-şägirtlik ýoluny netijeli dowam etmekde zerur bolan ähmiýetli pursatlara öwrüldi. Netijeli we işjeň ýagdaýda geçen duşuşygyň dowamynda türkmen edebiýatynyň görnükli wekilleri we döwürdeş ýazyjylaryň hem-de şahyrlaryň döredijilik işi barada pikir alyşmalar boldy.
Medeniýet hepdeligi Balkanabat şäherindäki Nebitçiler medeniýet köşgünde Lebap we Mary welaýatlarynyň medeniýet we sungat ussatlarynyň baýramçylyk konserti bilen dowam etdi. Konsert Medeniýet hepdeliginiň üçünji gününiň özboluşly jemlenmesine öwrüldi. Medeniýet köşgünde geçirilen konsertiň dabarasy has-da belent boldy. Joşgunly aýdym-sazly çykyşlarda ösüşleriň belentliklerine tarap ynamly gadam urýan ýurdumyzyň ýeten derejesiniň, halkymyzyň bagtyýar durmuşynyň we Gahryman Arkadagymyzyň başyny başlan giň gerimli özgertmeleriniň Arkadagly Gahryman Serdarymyzyň baştutanlygynda üstünlikli durmuşa geçirilmegi netijesinde gazanylýan üstünlikleriň waspy ýetirildi.
Artistleriň çykyşlarynyň ýurdumyzyň häzirki döwürde gazanýan ösüşleriniň esasy tapgyrlaryny görkezýän wideoşekiller bilen utgaşmagy baýramçylyk konsertiniň ýakymly pursatlara we ýatda galyjy wakalara beslenmegini şertlendirdi. Konserte gatnaşyjylaryň şowhunly el çarpyşmalary sungat ussatlaryny täze ajaýyp ýeňişlere ruhlandyrdy. Lebap, Mary welaýatlarynyň medeniýet we sungat ussatlarynyň ajaýyp çykyşlary Gahryman Arkadagymyzyň milli medeniýetimizi we sungatymyzy dünýä derejesine çykarmaga gönükdirilen asylly başlangyçlaryny mynasyp dowam etdirýän Arkadagly Gahryman Serdarymyzyň alyp barýan giň gerimli işleriniň, halkymyzyň bagtyýar durmuşynyň senasy bolup ýaňlandy.
“Garaşsyz, baky Bitarap Türkmenistan — bedew batly at-myradyň mekany” ýylynyň her bir güni şanly wakalara we ýurdumyz hem-de halkymyz üçin taryhy ähmiýetli pursatlara beslenýär. Aýdym-sazlaryň belentden ýaňlanmagy merdana halkymyzyň ruhubelentliginiň, ösüp gelýän ýaş nesilleriň watansöýüjiliginiň we ýurdumyzyň ähli ugurlar boýunça sazlaşykly ösüş ýoluna düşendiginiň aýdyň nyşanydyr.
Medeniýet hepdeliginiň çäklerinde guralan baýramçylyk konsertine gatnaşyjylar ýurdumyzda milli medeniýetiň we sungatyň ähli ugurlar boýunça ösdürilmegine döwlet derejesinde ähmiýet berilýändigi üçin Gahryman Arkadagymyza we Arkadagly Gahryman Serdarymyza çuňňur hoşallyklaryny beýan etdiler.
Milli medeniýetimiziň we sungatymyzyň döwrebap derejede ösdürilýändigini alamatlandyrýan Medeniýet hepdeliginiň giň gerimli çäreleri uly üstünlik bilen dowam edýär.
