Gazagystanyň Aktau şäherinde başlanan WKF görnüşindäki karate boýunça Merkezi Aziýanyň 11-nji çempionatynyň ilkinji gününde Türkmenistanyň türgenleri 4 medal – 1 altyn, 1 kümüş we 2 bürünç medal gazandylar.

Üç gün dowam etjek ýaryşa Eýrandan, Gazagystandan, Gyrgyzystandan, Täjigistandan, Türkmenistandan we Özbegistandan gelen 500-e golaý türgen gatnaşýar. Olar ýaşlaryň, ýetginjekleriň we ulularyň arasynda ýaryşyň kata (tehniki hereketleriň toplumy) hem-de kumite (tutluşyklar) görnüşlerinde medallar ugrunda bäsleşýärler.

Türkmenistanyň Karatedo federasiýasynyň habar bermegine görä, ýurdumyzyň ýygyndysy 36 türgenden, 4 tälimçiden, 6 eminden we 1 wekilden ybarat.

Çempionatyň ilkinji gününde türkmen türgenleri ýaryşyň kata görnüşi boýunça medallara mynasyp boldular.

Mary welaýatynyň Baýramaly şäherindäki 18-nji orta mekdebiň 7-nji synp okuwçysy Muhammetresul Haýrullaýew 14 ýaşa çenli oglanlaryň arasynda altyn medala eýe boldy.

16–17 ýaşly ýetginjekleriň arasynda 52-nji ýöriteleşdirilen orta mekdebiň 11-nji synp okuwçysy Allanur Ýalkabow kümüş medal gazandy.

10–11 ýaşlylaryň arasynda bolsa Mary welaýatynyň Baýramaly şäherindäki 6-njy orta mekdebiň 5-nji synp okuwçysy Musa Gurbanow we şol şäheriň 11-nji orta mekdebiň 4-nji synp okuwçysy Şirmuhammet Garymyradow bürünç medala mynasyp boldular.

Ýaryşlar dowam edýär.