Türkmenistanyň Söwda-senagat edarasynyň binasynda ösüp gelýän ýaş nesil üçin giň gerimli çäreleri we mümkinçilikleri özünde jemleýän «Kids EXPO: ähli zat çagalar üçin» atly halkara sergi-ýarmarkasy giň gerimde geçirilýär.
Sergä gatnaşyjylaryň arasynda ylym, döredijilik, sport we daşary ýurt dillerini öwrenmek ugurlarynda başarnyklary ösdürmäge gönükdirilen maksatnamalary hödürleýän köp sanly bilim merkezleri bar.
Gatnaşyjylaryň arasynda iň özüne çekiji diwarlyklaryň biri Eýran Yslam Respublikasynyň Türkmenistandaky ilçihanasynyň ýanyndaky Medeniýet merkezine degişli boldy. Aşgabatdaky eýran medeniýetiniň bu merkezi öz işiniň esasy ugurlary – pars dili okuwlary, hatdatlyk we şekillendiriş sungaty boýunça okuwlar bilen tanyşdyrýar. Merkeziň diňleýjileri diňe bir dili öwrenmek bilen çäklenmän, eýsem, yzygiderli geçirilýän ylym-bilim we döredijilik çäreleriniň, şeýle hem Türkmenistanda Eýran Yslam Respublikasynyň Medeniýet günleriniň üsti bilen milli medeniýete has çuňňur aralaşýarlar.
Diwarlygyň merkezi ýerinde giň kitaphana ýerleşýär. Onda türkmen halkynyň Milli Lideri Gahryman Arkadagymyzyň eserleriniň pars diline terjime edilen neşirleri, Magtymguly Pyragynyň goşgulary, şeýle hem pars we türkmen halk ertekileriniň terjimeleri ýerleşdirilipdir. Dil öwrenijileriň arasynda ýöriteleşdirilen pars-türkmen sözlügi uly islegden peýdalanýar. Ýakynda çykarylan täze neşirleriň arasynda bolsa milli eýran tagamlarynyň taýýarlanyş usullarynyň ýygyndysy hem bar.
Eýran Yslam Respublikasynyň Türkmenistandaky ilçihanasynyň ýanyndaky Medeniýet merkezi türkmen-eýran hyzmatdaşlygynyň ösdürilmegine, iki ýurduň arasynda ynsanperwer we dostluk gatnaşyklarynyň pugtalandyrylmagyna uly goşant goşýar.
Pars dili okuwlaryna we bilim maksatnamalaryna ýazylmak baradaky has giňişleýin maglumatlary şu telefon belgisi arkaly alyp bolýar: (+993 12) 93-42-11.
