Paýtagtymyzyň çagalary we ýaş myhmanlary üçin Türkmenistanyň Söwda-senagat edarasynda geçirilýän «Kids EXPO: ähli zat çagalar üçin» atly halkara sergi-ýarmarkasy ýatdan çykmajak, täsirli pursatlardan doly. Müňlerçe oglanjykdyr gyzjagazlar bu ýere, gyzykly we özüne çekiji gurşawyň höküm sürýän ýerine howlugýarlar. Meniň ýoldaşlarym doganlar Alina bilen Pawlik boldy. Olar bu ýere eýýäm ikinji gezek gelýärler we aslynda, ägirt uly güýmenje hem-de öwrediji sergi bilen men olary däl-de, olar meni tanyşdyrýarlar.
Girelgäniň agzynda çagalaryň söýgüli gahrymany Garri Potteriň 9¾-nji platformadaky sergi diwarlygy garşy aldy. Ol ýerde baýguş we onuň ertekiler dünýäsinden dürli jadyly zatlar ýerleşdirilipdir. Birden-de, märekäniň arasyndan elinde skelet göterip barýan oglanjyk bize tarap geldi. Ýöne hiç kim muňa geň galmady, sebäbi hemmeler onuň plastmas süňkdügini bilýärdi.
Meniň ünsümi Türkmenistanyň Dokma senagaty ministrliginiň çagalaryň egin-eşikli diwarlygy çekdi. Ýöne meniň seredip duran moda köýneklerim, kombinezonlarym we kurtkalarym ýoldaşlarymy kän gyzyklandyrmady. Şonuň üçin olaryň nämä has köp gyzyklanýandygyny bilmek isledim. Pawlik «Planetariýa» howlugýardy, şeýle hem «Küşt» meýdançasyna barmak isleýärdi, Alina bolsa «Mental arifmetika» meýdançasyna gitmek isleýärdi. Häzirki zaman çagalary!
Biz «Planetariýa» meýdançasyna girdik. Bu ýerde edil älem giňişligindäki ýaly ýarym garaňkylyk höküm sürýärdi. Gatnaşyjylar interaktiw maksatnama boýunça geçirilýän ýaryşlarda planşet arkaly dolandyrýan marsohodlar başga bir planetanyň kartasy görnüşindäki Marsda hereket edýärdiler. Bu örän döredijilikli meýdançanyň guramaçysy «Türkmen Expo» kompaniýasydyr. Biz Pawligi kosmosda galdyryp, Alina bilen sergi bilen tanyşmaga ugradyk.
«Hünärler şäheri: geljege 5 ädim» diwarlygy «Kids EXPO » sergisiniň uly diwarlyklaryň biri boldy. Bu ýerde her kim öz göwnüne ýaraýan hünäri saýlap bilýärdi: lukman, agronom, uçarman, programmist, dizaýner. Her bir myhmana saýlan hünärinde özüni synap görmäge mümkinçilik berilýär. Ine, tanyş skelet hem şu ýerde! Ol dürli nusgalaryň we lukmançylyk enjamlarynyň arasynda durdy.
Sergi zolagynyň merkezinde bulgurlara, söwda haltalaryna, daraklara we beýleki zatlara nagyş çekmek hem-de surat çekmek boýunça ussatlyk sapaklary geçirilýärdi. Biraz aňyrda bolsa kepjebaş görnüşinde örmek boýunça ussatlyk sapagy guralypdy. Dürli lentajyklardan bir-iki sany syryň kömegi bilen owadan we örän döwrebap bilezikler ýasalýardy.
Sergi-ýarmarkada çaphana önümlerine hem giň orun berlipdir. «Kitap» meýdançasynyň girelgesini bir metr ululykdaky äpet «Akpamyk» kitaby bezäp dur. Bu ýerde türkmen nusgawy şahyrlarynyň eserler ýygyndylaryny, şeýle hem reňkli suratlar bilen bezelen çagalar kitaplaryny görmek bolýar. Ýanynda bolsa depderler, gündelikler we okuw torbalary ýerleşdirilen «Okuwçy üçin ähli zat» meýdançasy bar.
Şol ýerde Alina bilen Pawligi ýadymyza saldyk-da, «Planetariýa» tarap howlukdyk. Pawligiň kosmos ýaryşlarynda haýsy orny eýeländigini soramaga-da ýetişmedik, sebäbi «Küşt» meýdançasyna gitmäge howlugýardyk. Ol ýerde üç jübütiň arasynda ýaryş geçirilýärdi, oýunçylaryň arasynda bir gyzjagaz hem bardy. Indiki ýaryşlarda oýnamak üçin nobata durduk, ýöne töwerekde şeýle köp gyzykly zat barka, bir ýerde durmak mümkin däldi.
Ünsümizi gurjak teatrynyň tutuly sahnasy ýerleşýän meýdança çekdi. Ýorduma görä, iki sany gurbaga biri-birine şadyýanlyk bilen haýsydyr bir ertekini gürrüň berýärdi. Pawlik görkezilişe gyzykdy we gurbagajyklaryň ýanyna baryp, gürrüň berýän gahrymanlaryň birinden beýlekisine seredip durdy. Soňra saz ýaňlandy we tutynyň aňyrsyndan gündogar perisi peýda boldy. Ol sazyň owazyna şowhunly tans edýärdi. Sahna oýnuna tomaşa edýän çagalar ajaýyp peri bilen bilelikde tans edip başladylar. Iň gowy tans edenleriň arasynda Pawlik bilen ýene bir gyzjagaz bardy.
Ahyrsoňy, biz «Mental arifmetika» meýdançasyna ýetdik. Görüp otursak, mental arifmetika häzirki wagtda ösüp gelýän nesliň arasynda örän meşhur eken. Bu ýere gelmek isleýänleriň sany küşt üçin nobata duranlardan hem köpdi. Biz biraz nobata durduk, ýöne soňra kakasy Alina sagadyny görkezdi.
Kakasy «Altyn asyr» elektron gazetiniň redaksiýasynyň fotohabarçysy Alekseý Gimalitdinow, Alina bilen Pawlik bolsa onuň çagalary. Küşt hem-de mental arifmetika boýunça meýilnamalary amala aşmasa-da, çagalar «Kids EXPO: ähli zat çagalar üçin» atly halkara sergi-ýarmarkasyna baryp görenlerine örän begendiler.
