Türkmenistanyň Prezidenti Serdar Berdimuhamedow gurluşygy tamamlaýjy tapgyrda bolan täze Stomatologiýa merkezine baryp görmeginiň dowamynda implantologiýa bölüminiň we diş tehnikleriniň barlaghanasynyň enjamlaşdyrylyşy bilen tanyşdy. Emeli aň esasly innowasion ulgamlaryň ornaşdyrylmagy protez goýmak işlerini awtomatlaşdyrmaga we hirurgiýa amallarynyň takyklygyny ýokarlandyrmaga mümkinçilik berer.

Implantologiýa bölüminiň otaglarynda ýokary derejede takyk sanly 3D-skaner enjamlary oturdyldy. Olara ornaşdyrylan emeli aň algoritmleri uly göwrümli maglumatlary dessine işläp, implantlaryň ýerleşişi, aralyklaryny we oturdylyş burçlaryny örän ýokary takyklyk bilen hasaplamaga ukyplydyr.

Infrastrukturanyň esasy bölekleriniň biri 45 hünärmeniň işlemegine niýetlenen, sanly dolandyryş ulgamy bilen enjamlaşdyrylan diş tehnikleriniň barlaghanasydyr. Barlaghana häzirki zaman CAD/CAM programma toplumlary (kompýuter goldawly taslama we önümçilik toplumlary) bilen üpjün edildi. Bu ýerde üç ölçegli nusgalary (3D-prototipleşdirmek) awtomatik çap etmek we arassalama enjamlary hem işe girizildi. Şeýle hem hil gözegçiligi ulgamy göz öňünde tutuldy. Emeli aň algoritmleri taslama düzülende garaşylmaýan ýalňyşlyklaryň öňüni almaga mümkinçilik berýär. Bu bolsa döwrebap ýokary hilli materiallardan çylşyrymly, berkligi ýokarlandyrylan ortopediki konstruksiýalary gysga wagtda taýýarlamaga şert döredýär.