Türkmenistanyň döwlet edaralarynyň we milli köpçülikleýin habar beriş serişdeleriniň wekilleri üçin guralan okuw-tanyşdyryş maksatnamasynyň çäklerinde wekiliýet deňiz senagaty ulgamyndaky Sýamen ýokary tehnologiýalar parkyna baryp gördi.
Sýamen şäheriniň Okean ösüş müdirliginiň baş inženeri, parkyň ýörite iş toparynyň ýolbaşçysynyň orunbasary Çžan Lýansun bu desganyň Fuszýan welaýatynda deňiz ulgamyndaky ilkinji welaýat derejesindäki ýokary tehnologiýalar parky bolup durýandygyny belledi. Onuň aýtmagyna görä, ýokary derejeli ylmy-barlag platformalarynyň döredilmegi pudak bilen baglanyşykly kärhanalary üstünlikli çekmäge mümkinçilik berýär.
Bilermeniň bellemegine görä, türkmen we hytaý taraplarynyň hyzmatdaşlygy üçin uly mümkinçilikleri bar. Bu hyzmatdaşlyk Türkmenistanyň çäginde Hazar deňziniň ekologiýa taýdan dikeldilmegi, şeýle hem deňiz we balykçylyk serişdeleriniň netijeli özleşdirilmegi ýaly ugurlary öz içine alýar. Sýamen tarapy öňdebaryjy ylmy platformalara eýe bolup, deňiz ulgamynda ylmy-tehniki hyzmatdaşlyk boýunça çuňlaşdyrylan gepleşikleri geçirmäge taýýardyr.
Sýamen ýokary tehnologiýalar parky 10,27 inedördül kilometr meýdany eýeleýär we döwlet edaralarynyň utgaşdyryjy ornuny çeýe bazar mehanizmleri bilen utgaşdyrýar. Bu ýerde deňiz senagaty üçin döwrebap enjamlar, şeýle hem deňiz biologik önümleri, «gök uglerod» ykdysadyýeti we akylly tehnologiýalar esasy ýöriteleşdirilen ugurlar hökmünde kesgitlenendir.
Parkyň işi ýörite şäher ösüş gaznasy tarapyndan goldanylýar. Bu gazna işläp taýýarlamalaryň ornaşdyrylmagyna we täze rezidentleriň ýerleşdirilmegine maksatly goldaw berýär.
Parkyň infrastrukturasynyň möhüm bölegini esasy ylmy-önümçilik meýdançalary düzýär:
Luszýan innowasiýa barlaghanasy – Sýamen şäheriniň hökümeti, Sýamen uniwersiteti we HHR-iň Tebigy serişdeler ministrliginiň Üçünji okeanografiýa instituty tarapyndan bilelikde döredilen ýokary derejeli platformadyr. Barlaghana deňiz seleksiýasy we tohumçylyk, biologik önümleri, ekologiýa monitoringi hem-de «gök uglerod» ykdysadyýetiniň standartlary ugurlarynda «barlag + tejribe-senagat taýdan synag + senagatlaşdyrma» toplumlaýyn nusgasy boýunça işläp taýýarlamalary alyp barýar. Barlaghana eýýäm importyň ornuny tutýan birnäçe tehnologiýany ornaşdyrdy, täjirçilik taslamalaryny durmuşa geçirdi we daşary ýurtly hyzmatdaşlar üçin açykdyr.
Üçünji okeanografiýa institutynyň Senagat ösüş merkezi – deňiz barlaglarynyň netijelerini işewür inkubasiýa we tejribe-senagat taýdan ornaşdyrmak üçin milli derejedäki platformadyr. Dünýäde öňdebaryjy çuň deňiz mikroorganizmleriniň maglumatlar gorlarynyň birine daýanýan merkez deňiz derman serişdelerini we biologik önümlerini döretmek boýunça ýöriteleşýär hem-de deňiz biolukmançylyk klasteriniň kemala gelmegine işjeň ýardam berýär.
