Türkmen türgenleri Ýaponiýanyň Aýti prefekturasynyň merkezi Nagoýa şäherinde iki hepde dowam eden XX tomusky Aziýa oýunlaryndaky çykyşlaryny iki kümüş medal bilen tamamladylar.
Toparyň ilkinji kümüş medalyny 75 kilograma çenli agram derejesinde çykyş eden karateçi Dawut Nazmyradow gazandy. Ol soňky tutluşykda eýranly türgen Morteza Nematadan 3:4 hasabynda asgyn geldi. Ikinji kümüş medaly 110 kilograma çenli agram derejesinde çykyş eden agyr atletikaçy Şahzadbek Matýakubow jemi 410 kilogram (188+222) agramy götermek bilen gazandy. Ol diňe ştangany silterläp götermekde dünýä rekordyny (197 kilogram) we Aziýa oýunlarynyň iki rekordyny – ştangany silterläp götermekde (226 kilogram) we iki görnüşiň jeminde (423 kilogram) goýan Tokio – 2020 Olimpiýa çempiony özbegistanly Akbar Juraýewden asgyn geldi.
Erkin göreş boýunça ýaryşynyň soňky gününde 25 ýaşly sport ussady Şatlyk Hemelýaýew (agram topary 97 kilogram) bürünç medala golaýlady. Çärýek finalda ol 24 ýaşly 2025-nji ýylyň dünýä çempiony we 2024-nji ýyldaky Pariž Olimpiýa oýunlarynyň bürünç medalynyň eýesi, ahyrynda Aziýa oýunlarynyň çempiony bolan eýranly Amirali Azarpirden 0:10 hasabynda ýeňildi. Soňra Şatlyk pakistanly Muhammad Gülzary 57 sekuntda 12:0 hasabynda wagtyndan öň ýeňdi, ýöne bürünç medal ugrundaky bäsleşikde Aziýanyň üç gezek çempiony we 2025-nji ýyldaky dünýä çempionatynyň bürünç medalynyň eýesi ýaponiýaly Araş Ýoşidadan 1:12 hasabynda ýeňilmek bilen, hormat münberine bir ädim ýetmän galdy.
Umumy toparlaýyn medal sanawynda Türkmenistanyň ýygyndy topary medal gazanan 40 ýurduň arasynda 31-nji orny eýeledi. Nagoýa şäherinde geçen XX tomusky Aziýa oýunlarynda 71 ugur we sportuň 43 görnüşi boýunça 469 medal ugrundaky ýaryşda 45 ýurtdan gelen jemi 10 müň 800 türgen bäsleşdi. Türkmenistanyň wekiliýeti 57 adamdan, şol sanda sportuň sekiz görnüşi: boks, göreş, karate, kuraş, ýeňil atletika, suwda ýüzmek, agyr atletika we uşu boýunça 35 türgenden ybaratdy.
2023-nji ýylda Hytaýyň Hançžou şäherinde geçen öňki Aziýa oýunlarynda Türkmenistanyň wekiliýeti 104 adamdan, şol sanda sportuň 11 görnüşi: 3x3 basketbol, boks, erkin we grek-rim göreşi, jiu-jitsu, dzýudo, kuraş, karate, ýeňil atletika, suwda ýüzmek, agyr atletika we uşu boýunça 67 türgenden ybaratdy. Şonda türkmen türgenleri alty sany bürünç medal bilen dolanypdylar, olary Maýsa Pardaýewa (dzýudo, 57 kilograma çenli), Aýnur Amanowa (kuraş, 48 kilograma çenli), Işanmyrat Ataýew (kuraş, 90 kilograma çenli), Baýramdurdy Nurmuhammedow (boks, 71 kilograma çenli), Döwletmyrat Orazgylyjow (erkin göreş, 86 kilograma çenli) we Baýry Baýryýew (karate, 67 kilograma çenli) dagy gazanypdylar.
1994-nji ýyldan bäri, türkmen türgenleri Aziýa oýunlarynda garaşsyz topar hökmünde dokuzynjy gezek çykyş edýärler. Şu ýyllaryň dowamynda ýurdumyzyň türgenleri üç altyn, 10 kümüş we 18 bürünç bolmak bilen, 31 medal gazandylar. Garaşsyz Türkmenistanyň taryhynda 1994-nji ýylda Hirosimada geçen Aziýa oýunlarynyň ilkinji altyn medalyny 76 kilograma çenli agram derejesinde çykyş eden meşhur agyr atletikaçy Altymyrat Orazdurdyýew gazanypdy. Ýene iki medaly bolsa mergen Igor Pirekeýew gazandy: 1998-nji ýylda Bangkokda ýatyp, kiçi gülleli tüpeňden 50 metrdäki nyşanany urmak ýaryşynda, 2002-nji ýylda bolsa Pusanda tüpeňden üç ýagdaýda – dyzyňa çöküp, dik durup we ýatyp 50 metrden nyşanany urmak ýaryşynda.
Indiki, XXI tomusky Aziýa oýunlary 2030-njy ýylda Kataryň Doha şäherinde geçiriler.
