Şu gün Kemine adyndaky Döwlet drama teatrynda hindi filmleriniň görkezilişiniň guralmagy bilen baglylykda dabaraly çäre geçirildi. Bu dabara Türkmenistanyň we Hindistan Respublikasynyň arasyndaky özara dostlukly gatnaşyklary ösdürmekde nobatdaky medeni çärä öwrüldi.


Hindi kinematografiýaçylarynyň filmleri bilen tanyşdyrmak boýunça Türkmenistanyň Medeniýet ministrligi, Hindistan Respublikasynyň Türkmenistandaky Ilçihanasy we Ilçihananyň ýanyndaky Hindi medeniýet merkezi tarapyndan guralan dabara medeniýet ulgamynyň, köpçülikleýin habar beriş serişdeleriniň, şäheriň jemgyýetçiliginiň wekilleri we talyp ýaşlar gatnaşdy.

Hindistan Respublikasynyň Türkmenistandaky Adatdan daşary we Doly ygtyýarly ilçisi Sunil Jain öz çykyşynda Maryda geçirilýän şu çäräniň Türkmenistanyň we Hindistan Respublikasynyň arasynda däbe öwrülen dostlukly gatnaşyklaryň, şol sanda medeniýet-gumanitar ugurdaky hyzmatdaşlygyň mundan beýläk-de pugtalandyrylmagyna we ösdürilmegine ýardam berjekdigini belledi.

Şunda hindi kinematografiýaçylarynyň birnäçe işleri görkezildi. Olaryň arasynda “Tarzan: Superkar” atly komediýaly drama, “Gaçgaklykda”, “Patyşa Singh” we “Kazino “Çaýna taun, 36” atly gülküli filmler, “Durmuş – göçgünli oýun” atly tragiki film, “Söýgi gudrat döredýär”, “Meniň uýam gelin boldy” atly melodramalar, “Söýgi hakyndaky rowaýat” atly liriki film bar.

Hindi kinosynyň hepdeligi 6-njy aprele çenli dowam eder.