Çagalar -sagalyş merkezlerinde mekdep okuwçylarynyň dynç alyş möwsümi dowam edýär. Iň döwrebap çagalar toplumlary türkmen paýtagtynyň gözel künjegi boan bolan Gökdrede we Awazada ýerleşýär.Ýurdumyzyň dynç alyş merkezleriniň ählisinde bolşy ýaly, bu ýerde hem çagalaryň doly derejede dynç almagy, beden taýdan taplanmagy, aň-paýhas hem döredijilik taýdan ösmegi, täze dost tutunyp, dogduk ülkäniň medeniýeti, däp-dessurlary, taryhy we tebigaty barada düşünjesini artdyrmaklary üçin ähli şertler döredilen.

Türkmenistanyň Bilim ministrligi Medeniýet ministrligi, Sport baradaky döwlet komiteti, Kärdeşler arkalaşygynyň Milli merkezi, Ýaşlar guramasy, beýleki pudaklaýyn edaralar we guramalar bilen hyzmatdaşlykda çagalaryň gyzykly we netijeli dynç almagy üçin maksatnamalary taýýarlapdyrlar.

BMG-nyň Ilat gaznasynyň we Bilim minstrliginiň howandarlygynda Gökderedäki çagalar-sagaldyş merkezlerinde çagalaryň arasynda sagdyn durmuş ýörelgesini wagyz etmek boýunça maglumatlar-düşündiriş çaresi geçirildi.

Çagalar futbol, basketbol, woleýbol, suwda ýüzmek, welosiped sporty, stol üstünde oýnalýan tennis, şaşka, küşt we düzzüm boýunça dürli bäsleşiklere höwes bilen gatnaşýarlar. Belli türgenlerdir tälimçiler, artistlerdir telewideniýede gepleşik alyp barýanlar, nakgaşlar, alymlar, ýazyjylar we ekologlar olar bilen duşuşyklar geçirýärler.

Paýtagtymyzyň teatrlarynyň, aýdym-saz we tans toparlary, sirk artistlri olaryň öňünde çykyş edýärler. Çagalar Janly tebigat muzeýine, paýtagtyň sergi merkezlerine, seýilgähleredir dynç alyş merkezlerine gezelenç edýärler, ak mermere bürenen Aşgabadyň gözel ýerlerine, Olimpiýa şäherçesine baryp görýärler.

Çagalar dürli gurnaklara gatnaşýarlar. Gyzjagazlar tagam taýýarlamaga, haly dokamaga we keşde çekmäge ukyp-başarnyklaryny görkezse, oglanjyklar ýaş konstruktorlar, halas edijiler, ýangyn söndürijiler we ýol hereketiniň gözegçileri hökmünde özüni synaýarlar. Dürli zatlary ýasamakda, surat çekmekde we surata almakda öz zehinlerini açyp görkezýärler.

Çagalaryň sazlaşykly ösüşine, intellektual, beden we döredijilik taýdan ösen nesli kemala getirmäge ýardam etmek—ertirki günümiz barada aladadyr. Çagalar üçin multimediýa tehnologiýaly çagalar baglarynyň we mekdepleriniň, sport we dynç alyş toplumlarynyň, lukmançylyk hyzmatlary merkezleriniň gurulmagy, bilim, terbiýe we durmuş ulgamynyň kämilleşdirilmegi Türkmenistanyň geljeginiň hatyrasyna amala aşyrylýan işlerdir.