Adamlary dostlaşdyryp, jebisleşdirýän Gurban baýramy türkmen ilinde şatlyk-şagalaň bilen giňden toýlanylýar. Ýagşy niýetleriň we hoşmeýilliligiň bu baýramy her bir öýde bellenilýär.

Ahal welaýatynda Änew şäheriniň meýdançasy dabaralaryň merkezi boldy, bu ýerde baýramçylyk ak öýleri we belent hiňillikler dikildi. Ýigitler ahal-teke bedewlerini atlansalar, çeper elli zenanlar nepis el senedini görkezdiler, erkek adamlar äpet gazanlarda dürli tagam atardylar. Aksakal ýaşulylar ýaş-ýigdekçeler bilen dograma dograýardylar, palawyň hoşboý ysy çar bark urýardy. Welaýat Medeniýet müdirliginiň, şäherleriňdir etraplaryň medeniýet bölümleriniň artistleriniň gatnaşmagynda köp adamly konsert boldy.

Sportuň dürli görnüşleri boýunça bäsleşikler geçirildi. Küşt oýnaýanlaryň mähellesi has-da kändi. Ýaşlar höwes bilen kiçi futbol, woleýbol oýnasa, ýaglyga towusýanlar çeýeligini görkezse, bilegi güýçliler bil tutuşyp, göreşe çykýardylar.

Balkan welaýatynda gurlan ak öýleriň ýanynda däp bolşy ýaly, çekdirme, çorba, palaw ýaly milli tagamlar taýaýrlanylyp, baýrama gelenlere hödür edildi. Iň gowy aşpezleriň taýýarlan baýramçylyk tagamlary saçaklary bezäp, ýurdumyzyň bolçulygyny nyşanlandyrdy.

Aljadyr şarlar bilen bezelen beýik hiňňiillikleriň ýany hasam köp adamlydy. Welaýatyň medeniýet we sungat ussatlarynyň, bagşylaryňdyr estrada aýdymçylarynyň, folklor-etnografiýa we beýleki döredijilik toparlarynyň çykyşlary has-da mähelleli boldy.

Baýrama gelenler ýaglyga towusmakda, göreşde, düzzümde güýç synanşyp, gymmatly baýraklary aldylar.

Bezemen geýnen oglan-gyzlar Gurban baýramynyň bezegi bolan hiňňildikde uçdylar.

Daşoguzda umumymilli baýramyň ilkinji güni welaýatyň Taryhy-ülkäni öwreniş muzeýiniň öňündäki kaşaň bezelen meýdança mähelle bary ýygnandy. Bagşylardyr çeper höwesjeňler aýdym-sazlary bilen gelenleriň göwnüni awladylar. Demirgazyk sebitiň günorta-günbataryndaky seýilgäh zolagyndaky açyk asmanyň aştyndaky teatrda hem Gurban baýramy şowhun-şagalaňly bellenildi. Ýaşlar belent hiňňilliklerde uçup, hezil etdiler. Mele-myssyk nanlardyr, gatlamalar, milli tagamlar, süýji nygmatlardyr gök-miweler sahawatly saçagyň bezegi boldy.

Lebap welaýatynda esasy dabaralar Türkmenabat şäherinde geçirildi. „Çarbag“ Seýilgähler toplumynda halkymyzyň ruhy gözbaşyna ygrarlylygynyň nyşany bolan äk öýler guruldy. Ençeme asyrlardan bäri bolşy ýaly, belent batly hiňňildikler al-asmana galdy. Bezemen sahnada welaýaryň belli bagşylarydyr döredijilik toparlary aýdym-saz etdiler.

Türgenler hem baýram güni çykyş etdiler. Asyrlarboýy däbe öwrülen, toý-baýramlaryň bezegi pälwanlaryň çekeleşikli tutluşyklary boldy.

Şeýle hem „Çarbag“ Seýilgäh zolagynda Lebap topragynyň nygmatlarynyň uly sergisi guraldy. Eli tagamly aşpezler uly gazanlarda baýramçylyk milli tagamlary taýýarladylar.

Gurban baýramynyň ikinji güni dabaralar Amyderýanyň kenaryndaky şäheriň Bitarap Türkmenistan köçesine geçirildi. Bu ýerdäki çüwdürimler toplumynda uly konsert boldy.

Baýramçylyk gezençleri durky täzelenen „Bitaraplyk“ seýilgähinde-de boldy.

Gurban baýramyna bagyşlanan dabaralar ýurdumyzyň gündogar sebitiňinň etraplarydyr şäherleriniň ählisinde guraldy.

Mary welaýatynda esasy baýramçylyk dabaralary äpet «Türkmeniň ak öýüniň» ýanynda geçirildi. Medeniýet işgärleriniň meşhur bagşy-sazandalaryň, aýdym-tans we folklor toparlarynyň gatnaşmagynda gurnan konserti baýrama aýratyn röwüş çaýdy.

Gurban baýramyna bagyşlanan baýramçylyk çäreleri welaýatyň ilatly ýerleriniň ählisinde geçirilip, halkyň agzybirligini, ruhy gymmatlyklara ygrarlydygyny görkezdi.