Saglyk ýagdaýy çäkli adamlary dikeltmegiň täze ugruny Türkmenistanyň körler we kerler jemgyýeti hem-de «Agama» alpinistler klubynyň müdirligi guradylar, oňa «Maýyplary goldamak merkezi», «BMG-Zenanlar» bölümi, Magtymguly adyndaky Ýaşlar guramasynyň Merkezi Geňeşiniň Çagalar gaznasy, telekeçi Jemile Japarowa hemaýatkärlik goldawyny berdiler. Ýaryşa gatnaşýanlaryň öňünde Aşgabadyň bardlar klubynyň agzalary çykyş etdiler.
-Halkara bileleşigi şanly we bellenilmäge mynasyp seneleriň birnäçesini belledi – diýip Körler we kerler jemgyýetiniň agzasy Leýla Ataýewa gürrüň berýär. – Olaryň arasynda –saglyk ýagdaýy çäkli adamlara kömek bermegiň zerurlygyny ýatladýan Halkara ak hasa güni bar. Adatça şol gün biz maýyplaryň durmuş we işewürlik işjeňligini ýokarlandyrmaga gönükdirilen duşuşyklar, okuw türgenleşiklerini, leksiýlar geçirýäris.
-Birnäçe ýyl mundan ozal alpinistler kluby saglyk ýagdaýy çäkli adamlar üçin guralan sport baýramyna niýetläp göçme trenažýor-diwarça gurnady – diýip «Agama» alpinistler klubynyň müdirliginiň başlygy Waleriý Kotwin gürrüň berýär. – Ýaryşa gatnaşanlaryň her birine howpsuzlyk esbaby bilen dik diwara çykmaga synanyşmaga mümkinçilik döredildi.
Adatça olar daýanç-hereket synalary şikesli maýyp adamlardy. Birdenem batyl ýaş zenan bäsleşige gatnaşmaga höwes bildirdi. Oňa howpsuzlyk esbaplaryny geýmäge kömek etdiler, gaýa çykan wagty degerli maslahat berdiler. Ol bellenilen ýoly geçip, aşak düşenden soň: «Başga ýoldanam geçip bolarmyka?»- diýip hyjuwly sorady. Onuň belentlige çykmaga höwesine haýran galdyk we oňa hormat-sarpamyz artdy. Bu ýagdaý hem göreji boýunça maýyplara uýgunlaşdyrylan gaýa çykmak Festiwalyny guramagymyza itergi berdi.
Olary «Agama» alpinistler klubyna çagyryp, biz şeýle adamlaryň ýalňyz däldigini ýatlatmaga, olaryň dikelmegine ýardam etmäge, bedenterbiýe we sport, şol sanda gaýa çykmak bilen meşgullanmagyny höweslendirmäge çalyşdyk. Biz saglyk ýagdaýy çäkli adamlaryň arasynda işjeň durmuş ýörelgesini wagyz etmegi, oňa jegyýetçiligiň we köpçülikleýin habar beriş serişdeleriniň ünsüni çekmegi maksat edindik.
Şu ýyl bäsleşik ikinji gezek geçirildi. Wezipäniň çylşyrymlydygyna garamazdan, oňa gatnaşan kyrk adamyň köpüsi emeli «gaýa» bellenilen wagtda galmagy başardy. Olaryň ählisine çäräniň guramaçylarynyň adyndan sertifikatlar we baýraklar gowşuryldy.
