Jemgyýetçilik işi boýunça täze hünärmenler Birleşen Milletler Guramasynyň Ösüş maksatnamasy tarapyndan Türkmenistanyň Zähmet we ilaty durmuş taýdan goramak ministrligi bilen hyzmatdaşlykda gurnalan giňişleýin okuwyň düzüminde nobatdaky 15 günlük tälim okuwyny geçdi.

45 günlük okuwyň soňky tapgyry tamamlanandan soň, olara jemgyýetçilik işleri pudagynda ýokary hünär derejesini tassyklaýan şahadatnamalar gowşuryldy. Şahadatnama gowşurmak dabarasy ýurduň dürli sebitinden bolan hünärmenleriň internet arkaly birikmesi bilen gibrid görnüşde geçirildi.

Soňky ýöriteleşdirilen okuw jemgyýetçilik işiniň anyk jähetlerine gönükdirilip, hünärmenleri sosial hyzmatlaryň täze modelini ýerli derejede synagdan geçirmäge gatnaşmak üçin taýýarlar.

Bu okuw maşgala konferensiýasy, çykgynsyz ýagdaýlarda goldaw bermek tejribesi, maksatly toparlaryň sosial bitewüleşmesi üçin sosial gulluklarda hyzmatdaşlyk we başgalar ýaly mowzuklary öz içine aldy.

Türkmenistanyň Zähmet we ilaty durmuş taýdan goramak ministrligi tarapyndan ýurduň hökümetiniň we BMG-niň agentlikleriniň bilelikdäki maksatnamasy çäginde 20 synag etrabynda işe alnan jemgyýetçilik işi boýunça 45 hünärmeniň milli tälimçilerden tälim alandyklaryny bellemek gerek, olar hem öz gezeginde Bolgariýanyň Sosial işi we tejribe institutyndan onlaýn okuw alypdylar. Milli tälimçiler 8 aýyň dowamynda – 2020-nji ýylyň noýabr aýyndan 2021-nji ýylyň iýul aýyna çenli ýurduň ähli sebitlerinde jemgyýetçilik işi boýunça hünärmenler üçin okuw geçirdiler.

Bu okuwlar, tapgyrlaryň arakesmelerinde ulanmak bilen, jemgyýetçilik işiniň nazaryýetini we amalyýetini öz içine alýardy. Mundan başga-da, halkara bilermenler jemgyýetçilik hünärmenleri üçin önümçilikden aýrylmazlyk şerti bilen her aý tälimçilik sapaklaryny geçirdiler.

Aýjahan Ataballyýewa