Beýik Britaniýa dalaşgärleri 2022 – 2023-nji okuw ýyly üçin internet arkaly geçirilýän “Çiwniň” (Chevening) talyphaky maksatnamasyna gatnaşmaga çagyrýar.

“AA”-yň habarçysyna Beýik Britaniýanyň Aşgabatdaky ilçihanasynda aýdylyşyna görä, “Çiwniň” talyphaky makasatnamasy Beýik Britaniýanyň hökümeti tarapyndan maliýeleşdirilmek bilen, mugallym taýýarlaýan we iňlis dilini öwredýän okuwlardan başga dürli ugurlar boýunça bir ýylyň dowamynda Angliýada magistr derejesini almaga mümkinçilik berýär. Talyphaky ýol çykdajylaryna, şeýle hem ýaşaýyş, eklenç we okuw tölegine ýetýär.

Üstünlik gazanan dalaşgärler öz işlerine täze başlan ýa ony ortalan ýagdaýda bolup, iňlis dilini örän gowy bilmelidirler.

Isleg bildirýänleriň hemmesi öz loginini (ulanyjy adyny) we parolyny döretmek arkaly websaýtyndaky elektron soragnamany doldurmalydyr. Soragnamany nädip dogry doldurmalydygy barada has giňişleýin maglumaty Beýik Britaniýanyň ilçihanasynyň websaýtyndaky ýaňy görkezilen websahypa girip alyp bilersiňiz.

Islendik başga sorag üçin şu elektron salgy boýunça Beýik Britaniýanyň ilçihanasyna ýüz tutmak bolar.

Soragnamalar internetde doldurylyp, 2021-nji ýylyň 2-nji noýabryna çenli tabşyrylmalydyr.

Çiwiň talyphakyny almak üçin saýlama ülňüleriniň “ýolbaşçylyk üçin zerur bolan şahsy, akyl we beýleki adamlar bilen gatnaşyk häsiýetleri bolan ýokary hünärli uçurymlary” kesgitlemäge gönükdirilendigini bellemelidiris. Çiwiň talyphaky üçin ulanylýan saýlama ülňüleri ýurtdan ýurda we ýyldan ýyla görä üýtgeýär.

Çiwiň Beýik Britaniýanyň geljekki ýolbaşçylara bu ýurtda okamak üçin taýsyz mümkinçilik hödürleýän halkara hökümet talyphaky maksatnamasydyr. Bu talyp haklary islendik ugur boýunça islendik Britan uniwersitetinde bir ýylda magistr derejesini almak üçin dünýäniň dürli künjeklerinden tapawutlanan hünärmenlere berilýär.

Çiwniň talyphaky dünýäniň dürli künjeklerinden bolan ýolbaşçy häsiýetli talyplara Beýik Brinatniýanyň uniwersitetlerinde okamaga mümkinçilik berýän halkara talyphaky ulgamydyr. Ol Daşary işler ministrligi, Arkalaşyga degişli işler we hyzmatdaşlyk gatnaşyklary boýunça ministrlik tarapyndan maliýeleşdirilýär.

Bu maksatnama gatnaşýanlar bir ýyl Beýik Britaniýada ýaşap okarlar, şol döwürde hünär we akademiki taýdan ösüp, öz ulgamyny giňeldip, Beýik Britaniýanyň medeniýeti bilen tanşyp we onuň bilen uzak möhletli oňyn gatnaşyk gurup bilerler.

Çiwniň talyphakyna nämeler girýär?

• uniwersitetde okuw tölegi,

• aýlyk talyphaky,

• Beýik Britaniýa gelip-gitmegiň ýol çykdajylary,

• geleniňden soňky çykdajylar,

• ýurduňa gaýtmak üçin uçar petegine kömek,

• bir wiza üçin ýüz tutmagyň bahasy,

• Beýik Britaniýadaky Çiwiň çärelerine gitmek üçin grant.

Maksatnama gatnaşmak üçin, islendik hünär eýesi ýüz tutup biler, ýöne ileri tutulýan ugurlar şulardyr:

Işewürlik, howanyň üýtgemegi, demokratiýa, ykdysadyýet, energetika howpsuzlygy, ekologiýa, innowasiýa, adam hukuklary, halkara gatnaşyklar, döwleti dolandyryş, žurnalistika, hukuk, syýasaty öwreniş, iş dolandyryş, ylym we arş.

Janmämmet Gulamow