Türkmenistanyň futbol boýunça ýaşlar ýygyndy toparynyň (ýaşy 23-e çenli) futbolçylary Iordaniýanyň paýtagty Ammanda geçirilýän «F» saýlama toparynda Palestinanyň ýygyndysyny 3:1 hasabynda utdular.

Duşuşygyň 18-nji minutynda Şamämmet Hydyrow sag tarapdan berlen pökgüni dürs urup, hasaby açdy.

Oýnuň ikinji ýarymynyň başynda Palestinanyň ýygyndysy hasaby deňledi. 64-nji minutda Şamämmet Hydyrow hasaby artdyrdy – 2:1. 88-nji minutda Welmyrat Ballakow hasaby 3:1-e ýetirdi. Ol toparyň kapitany Begençmyrat Myradowyň çep gyradan gowy tilsimli hüjümi bilen jerime meýdançasynda goragçydan we derwezebandan geçip, dürs beren pökgüsini boş derwezä aňsatlyk bilen gönükdirdi.

Bu türkmen futbolçylarynyň Ammanda saýlama tapgyrdaky ikinji oýnudy. Çekeleşikli geçen oýunda Iordaniýanyň ýygyndysyndan 0:1 hasabynda utulsalar-da,  olaryň Aziýa Kubogy-2022 ýaryşyň final tapgyryna çykmaga mümkinçiligi bar. «F» toparda birinji orny haýsy toparyň eýelejekdigi 31-nji oktýabrda Palestinanyň we Iordaniýanyň ýygyndylarynyň duşuşygynda belli bolar.

5-nji gezek geçirilýän Aziýa Kubogy-2022 ýaryşa 11 topara bölünen 42 ýygyndy gatnaşýar.

Ýaryşyň final bölegine toparlaryň ýeňijileri we ikinji orunda has gowy netije görkezen 4 ýygyndy çykar.

2022-nji ýylyň 1-19-njy iýuny aralygynda Daşkentde geçiriljek final ýaryşa meýdança eýeleri hökmünde Özbegistanyň ýygyndysy goşular.

Finala çykan iň güýçli toparlaryň üçüsi 2024-nji ýylda Parižde geçiriljek Olimpiýa oýunlarynda Aziýa wekilçilik eder.

«AA»-nyň habarçysy