Türkmenistanyň Milli Geňeşiniň Mejlisiniň wekilleri ÝHHG-niň 3-4-nji noýabrda onlaýn formatda geçirilen Parlament Assambleýasynyň 19-njy güýz mejlisine gatnaşdy.

Duşuşygyň çäginde ÝHHG-niň sebitindäki derwaýys howpsuzlyk meseleleri ara alnyp maslahatlaşyldy, ÝHHG-niň Parlament Assambleýasynyň işine we häzirki syýasy meselelerine syn berildi.

ÝHHG-niň Parlament Assambleýasynyň 19-njy güýz mejlisi Hemişelik komitetiň mejlisi bilen açyldy, onda, ÝHHG-niň Parlament Assambleýasynyň başlygy Margareta Sederfelt we ÝHHG-niň Baş sekretary Roberto Montella çykyş etdi.

4-nji noýabrda «Häzirki howpsuzlyk kynçylyklary: Owganystandaky ýagdaý» atly Parlament maslahaty geçirildi.

ÝHHG-niň Parlament Assambleýasy 1990-njy ýylda ÝHHG-niň Pariž sammiti tarapyndan döredilen halkara parlament gurluşydyr. Bu gurama ÝHHG gatnaşýan döwletlerde hemmetaraplaýyn howpsuzlygy gazanmak üçin, parlamentara gepleşiklere ýardam edýär. ÝHHG-niň Assambleýasynyň merkezi karargähi Kopengagende (Daniýa) ýerleşýär.

Parlament Assambleýasy ýylda üç gezek ýygnanýar: ýyllyk sessiýa, şeýle hem güýz we gyş mejlislerine. Her ýyllyk sessiýanyň gün tertibi üç umumy komitetiň hasabatlaryna garamagy we olaryň maslahat beriji häsiýetli kararlarynyň taslamasyny tassyklamagy öz içine alýar.

 Taýýarlan: Aýjahan Ataballyýewa