Türkmenistanyň çäginde alnan dört sany hronikal fotosurat GDA-nyň 30 ýyllygyna bagyşlanan bilelikdäki taslamanyň wirtual surat sergisine goşuldy.
TASS-yň suratçylary Stanislaw Karsilnikow we Waleriý Şarifullin tarapyndan alnyp taýýarlanan «Milli tans toparynyň Aşgabatda Türkmenistanyň Halkara Ynsanperwerlik we ösüş uniwersitetiniň esasy binasynyň öňünde çykyşy», «Türkmenistanyň halkara deňiz portunyň açylyşy», «Aşgabat Türkmenistanyň administratiw-syýasy, senagat, ylmy we medeni merkezidir», «Aşgabat aýlawynda ahalteke atlarynyň tanyşdyrylyşy» atly surat eserleri wirtual surat sergisinde neşir edildi.
TASS-yň habar bermegine görä, GDA-nyň 30 ýyllygyna bagyşlanan bilelikdäki surat taslamasy Arkalaşyga agza ýurtlaryň öňdebaryjy köpçülikleýin habar beriş serişdeleri tarapyndan taýýarlanypdyr. Arkalaşyga girýän döwletleriň döwlet maglumat agentlikleriniň, GDA agza ýurtlaryň milli habar gulluklarynyň birleşiginiň saýtlarynda, GDA internet portalynda ýerleşdirilen wirtual surat ekspozisiýasynda Azerbaýjanyň, Ermenistanyň, Belarusyň, Gazagystanyň, Gyrgyzystanyň, Moldowanyň, Russiýanyň, Täjigistanyň we Özbegistanyň döwlet habar gulluklary tarapyndan hödürlenen 45 hronikal kadr bar.
«Bu fotosurat taslamasy Arkalaşyga girýän ýurtlaryň durmuşyny we gazananlaryny, respublikalaryň üç onýyllygyň dowamynda dürli ugurlardaky özara gatnaşygyny görkezýär. Ýakyn geçmişden we häzirki döwürden täsirli parçalary GDA ýurtlarynyň öňdebaryjy habar agentlikleriniň iň gowy surat habarçylary ýazga alypdyr. Adamlary, ýadygärlikleri, senagat desgalaryny, şanly wakalary we gündelik durmuşy görkezýän kadrlar biziň umumy taryhymyzyň keşbiniň ştrihleri bolup galdy» diýip, GDA-nyň Döwlet habar gulluklarynyň (GDA-nyň maglumat geňeşi) başlyklarynyň Geňeş ýolbaşçysy, TASS-yň baş müdiri Sergeý Mihaýlow aýtdy.
Surat taslamasynda hödürlenen täsin suratlaryň arasynda TASS-yň metbugat suratçylary tarapyndan 1991-nji ýylyň 21-nji dekabrynda alnan Garaşsyz Döwletleriň Arkalaşygyny döretmek baradaky Ylalaşygyň teswirnamasyna Alma-Aty şäherinde gol çekilenden soň düşen 11 döwletiň ýolbaşçysynyň toparlaýyn suraty bar.
Şeýle hem, sergide Türkmenistanda halkara deňiz portunyň açylyş dabarasy, häzirki zaman Bakuwynyň binagärlik nyşany bolan «Alawly minaralar» binasynyň toplumy, Gazagystanyň Baýkonur kosmodromyndan «Soýuz MS-19» kosmos gämisiniň “Çagyryş” filmini döredijiler bilen uçurylyşy, Gyrgyzystanyň öňdebaryjy kärhanalarynyň biriniň — «Kyrgyz Unaa Kuruluş» maşyn gurluşyk zawodynyň, Ermenistanyň 1988-nji ýyldaky ýertitrmesinden soň dikeldilen Gümri şäheriniň şäher öwüşgini we beýleki suratlar bar.
GDA-nuň maglumat geňeşi 1995-nji ýylyň noýabr aýynda döredildi. Oňa Azerbaýjanyň, Ermenistanyň, Belarusyň, Gazagystanyň, Gyrgyzystanyň, Moldowanyň, Russiýanyň we Täjigistanyň döwlet habar gullugynyň ýolbaşçylary girýär. GDA-nyň Maglumat geňeşiniň işi GDA ýurtlarynyň maglumat pudagynda özara gatnaşygyny we hyzmatdaşlygyny üpjün etmäge, maglumatlaryň päsgelçiliksiz ýaýramagy we hünär tejribesiniň alyş-çalşygy üçin amatly şertleri döretmäge, şeýle hem metbugat hyzmatdaşlygyny pugtalandyrmaga gönükdirilendir.
