Türkmen döwlet medeniýet institutynyň aktýorlyk we režisýorlyk fakultetleriniň bäşinji ýyl talyplary Magtymguly Myşşyýewiň pýesasy boýunça Mollanepes adyndaky talyplar teatrynda goýlan «Ene» diplom spektaklynda hakyky aktýorlar kimin çykyş etdiler.

Akgözel eje iki ogul ýetişdirýär, olar ulalansoň şäherde ýerleşip, maşgalaly bolýarlar. Ejesiniň halyndan habar almaga wagt tapmaýarlar.

Akgözel ejäniň haly agyr diýip ogullaryna habar gowuşýar. Öýüň boşdugyny görüp, miras bölüşmäge başlaýarlar. Duýdansyz ejesi gelýär. Onuň elindäki düwünçegi görüp, geň galdyrýar. Enäniň elindäki düwünçekde ogullaryna niýetläp, öz eli bilen tiken ilkinji tahýajyklaryny, eziz balalaryna geýdiren bäbek köýnejiklerini apalap saklanýardy.

Akgözel ejäniň: «Men iki ogul ýetişdirdim, ýöne olardan tamam çykmady...» – diýýän sözleri tomaşaçylary tolgundyrdy.

Spektaklyň ahyrky sahnasyna synlanyňda, professor Annamyrat Saparmuhammedowyň we Türkmenistanyň halk artisti Muhammetguly Kasymowyň ýobaşçylygynda pýesada talyplaryň döreden gahrymanlarynyň keşpleriniň ýerine düşendigine göz ýetirýärsiň.

Diplom işi üçin şu pýesanyň saýlanyp alynmagynyň sebäbi, maşgala gatnaşyklary ähli döwürlerde bolşy ýaly biziň döwrümizde-de möhümdir — diýip, aktýorlyk ussatlygy we sahna dili kafedrasynyň müdiri Aýmämmet Işangulyýew gürrüň berdi.