«Daşoguz» toparynyň futbolçylary Türkmenistanyň demirgazyk sebitiniň dolandyryş merkezinde bir aýlawly ýaryşda ýeňiş gazanyp, Daşoguz welaýatynyň Kubogyny eýelediler.

Hormatly baýrak ugrunda «Turan», «Daşoguz», «Almaz» (üçüsi-de Daşoguz şäheriniň toparlary), Akdepe etrabynyň «Akdepe», S.A.Nyýazow adyndaky etrabyň «Nowbahar» we Ruhubelent etrabynyň «Ruhubelent» toparlary bäsleşdiler.

Ýaryşyň bäş tapgyrynyň netijesi boýunça «Daşoguz» we «Turan» birmeňzeş möçberde (13 utuk) topladylar. Ýöne, derwezä geçirilen hem-de goýberilen pökgi sanlarynyň iň oňat tapawudy boýunça Kubok «Daşoguza» nesip etdi. Daşoguz welaýatynyň Sport we ýaşlar syýasaty Baş müdirliginiň esasy sport mekdebiniň toparyny bu üstünlige baş tälimçi Aýbeg Sapaýew getirdi.

Üçünji orun üçin üç topar – «Ruhubelent, «Almaz» we «Nowbahar» bäsleşdiler. Olaryň hersi 6 utuk toplady. Emma, goşmaça görkezijiler boýunça üçünji orna «Ruhubelent» mynasyp boldy.

«Daşoguzyň» merkezi goragçysy 19 ýaşly Jasur Annamyradow ýaryşyň iň gowy oýunçysy diýlip yglan edildi.