Türkmenistanyň zenanlar topary (20 ýaşa çenli) futbol boýunça Aziýa Kubogy-2024-iň saýlama ýaryşynda Eýranyň we Bangladeşiň toparlary bilen duşuşar. Şu gün Kuala-Lumpurda (Malaýziýa) Aziýa futbol konfederasiýasynyň merkezinde geçirilen bije atyşlygyň netijesi şeýle.
Saýlama ýaryşyna gatnaşjak 31 topary 8-e bölüpdirler.
Türkmenistan we onuň garşydaşlary «H» topara girýär. Bu toparyň oýunlary 2023-nji ýylyň 4 – 13-nji martynda Bangladeşde bir tapgyrda geçiriler. 4-nji martda türkmen futbolçylary Bangladeşiň, 8-nji martda bolsa Eýranyň topary bilen duşuşar.
Beýleki toparlaryň düzümi şeýle:
«A» topary – Hytaý, Laos (ýer eýeleri), Goňkong, Filippinler;
«B» topary –Nepal, Birleşen Arap Emirlikleri, Demirgazyk Mariana adalary, Palestina (ýer eýeleri);
«С» topary –Awstraliýa, Gyrgyz Respublikasy (ýer eýeleri), Guam, Yrak;
«D» topary – Liwan, Iordaniýa (ýer eýeleri), Mongoliýa, Butan;
«E» topary –Taýland (ýer eýeleri, Taýwan, Täjigistan, Özbegistan;
«F» topary –Wýetnam (ýer eýeleri), Hindistan, Singapur, Indoneziýa;
«G» topary — Mýanma, Malaýziýa, Päkistan, Kamboja (ýer eýeleri).
Toparlaryň ýeňijileri 2023-nji ýylyň 3 – 12-nji iýuny aralygynda geçiriljek saýlama ýaryşyň ikinji tapgyryna çykarlar. Onuň netijelerine görä, iň oňat dört topar 2024-nji ýylyň 3-nji martyndan 17-nji martyna çenli Özbegistanda geçiriljek Aziýa Kubogy-2024-iň soňky bölüminde oýnamak hukugyny gazanar. Yklym çempionlygynyň jemleýji ýaryşyna Taýlandda geçen öňki Aziýa Kubogy-nyň netijeleri boýunça öňe saýlanan üç topar – Ýaponiýanyň, Demirgazyk Koreýanyň we Koreýa Respublikasynyň, şeýle-de, bäsleşigiň ýer eýesi hökmünde Özbegistanyň ýygyndy toparynyň gatnaşjakdygy belli boldy. Türkmen futbolçylary (20 ýaşa çenli) toparlaryň arasynda Aziýa Kubogynyň saýlama oýunlarynda ilkinji gezek çykyş eder.
«AA»-nyň habarçysy