Türkmenistanyň ýetginjekler ýygyndy toparynyň hokkeýçileri Ulan-Batorda 18 ýaşa çenli oýunçylaryň arasynda geçirilip tamamlanan ilkinji Aziýa we Okeaniýa çempionatynda kümüş medala mynasyp boldular. Guwançmyrat Jepbarowyň şägirtleri bu üstünligi ýaryşyň soňky gününde Eýranyň toparyny 14:1 hasabynda utup gazandylar.
Duşuşygyň ilkinji minutlaryndan başlap, türkmen toparynyň buz meýdançasyndaky oýunda ökdeligi ýüze çykdy. Oýun «bir derwezä» oýnalýan ýalydy. Şeýlelikde oýnuň ilkinji 20 minutynda eýranlylar biziň derwezeçimizi bary-ýogy iki gezek biynjalyk etdiler, türkmen hokkeýçileri bolsa garşydaşyň derwezesine 26 şaýba urdular we olaryň 8-si tora girdi. Üç döwürde Türkmenistanyň ýygyndy topary garşydaşyň derwezesine 65 gezek şaýba urdy, Eýran topary bolsa bary-ýogy 9 gezek urdy.
Birinji döwürde 8:0 hasabynda ýeňiş gazanan ildeşlerimiz ikinji 20 minutlyk döwürde az-kem haýalladylar we toparlar hasap Türkmenistanyň ýygyndy toparynyň peýdasyna 10:1-kä ikinji arakesmä çykdylar. Eýranlylar ýeke-täk şaýbany hasap 0:8-kä geçirdiler. Goragçylar Eil Hamza ilkinji döwürden soň esasy derwezeçi Taňryberdi Guwanjowyň ýerine gelen derwezeçi Wlad Zikratyh bilen bir-bire çykmaga we takyk urgy bilen hasaby açmaga ýol berdiler.
Geçirilen 9-njy şaýbadan soň Eýran topary-da derwezeçisini çalşyrdy. Derwezä Huseýn Kakawandyň ýerine Soheil Halaj durdy. Emma biziň hokkeýçilerimiz onuňam «sepini açdylar». Goragçy Nazar Orazow meýdançanyň merkezindäki gyzyl çyzykdan uzak aralyga urmagy başardy. Eýranyň täze derwezeçisi muňa taýýar däl eken we şaýba tora girdi.
Iň soňky döwürde türkmenistanly ýetginjekler Eýran toparynyň derwezeçisini ýene dört gezek gynandyrdylar we bu ýaryşda owal özbegistanly hokkeýçileriň eýran bilen oýunda goýan uly hasabyny (14:1) gaýtaladylar. Türkmenistanyň toparynda Nazar Orazow üç, Matweý Arhipow, Allan Muhyýew we Röwşen Aşyrow dagy iki-ikiden, Allaberdi Guwanjow, Alyhan Aleskerow, Serdar Durdyýew, Ýusup Atdaýew we Erkin Bäşimow dagy bolsa adama bir şaýbadan geçirdi.
Oýundan soň, 2600 adamlyk «Steppe» sahnasynyň gümmezleri astynda biziň hokkeýçilerimiziň yzly-yzyna dördünji ýeňşiniň hormatyna, Türkmenistanyň gimni ýaňlandy we bilermen eminler duşuşykda iň gowy oýnan oýunçylaryň atlaryny aýtdylar. Olar: Eýran toparyndan goragçy Mahbod Abdollahi, Türkmenistan toparyndan bolsa hüjümçi Serdar Durdyýewdi.
Aziýa we Okeaniýa çempionatynda toparymyzdan iň gowy oýnan oýunçy diýlip, derwezeçi Taňryberdi Guwanjow ykrar edildi, ol ýörite baýraga-da mynasyp boldy.
Ondan öň türkmenistanly ýetginjekler taýlandly deň-duşlaryndan 4:3, Birleşen Arap Emirliklerinden 7:2 we Mongoliýadan 6:4 hasabynda üstün çykypdy.
Ýaryşyň jemleýji gününde ýene iki oýun bolup, aşakdaky ýaly tamamlandy: Birleşen Arap Emirlikleri – Özbegistan – 1:8 we Taýland – Mongoliýa – 4:6.
Şeýlelikde, Özbegistanyň ýygyndy topary 18 ýaşa ýetmedik oýunçylaryň arasynda Aziýa we Okeaniýa çempionatynda ýeňiji boldy, ol mümkin bolan 15 utukdan 15 utuk toplady. Türkmenistanyň topary 12 utuk gazandy. Öňdäki üçlügiň ahyrky hataryny 9 utuk gazanan Mongol topary eýeledi.
Bäsleşik Halkara buzüsti hokkeý federasiýasynyň (IIHF) howandarlygynda geçirildi. Bir aýlawly ýaryşyň baýragy ugrunda Eýrandan, Mongoliýadan, Birleşen Arap Emirliklerinden, Taýlanddan, Türkmenistandan we Özbegistandan ýetginjekler bäsleşdiler.
Ilkinji Aziýa we Okeaniýa ýetginjekler (U18) çempionatynda Türkmenistanyň sport abraýyny Içeri işler ministrliginiň «Galkan», Söwda we daşary ykdysady gatnaşyklar ministrliginiň «Şir» we «Türkmengaz» döwlet konserniniň «Oguzhan» klublaryndan 20 sany ýaş hokkeýçileri gorady. Bu, olaryň durmuşynda ilkinji halkara ýaryşdy. Onda ildeşlerimiziň kümüş medallary gazanmagy örän guwandyryjydyr.
Toparymyzyň bu ajaýyp üstünligi bilen Türkmenistan hokkeý federasiýasynyň başlygy Jora Hudaýberdiýewi Mongoliýadan telefon arkaly IIHF-niň Aziýa sebiti boýunça wise-prezidenti Aýwaz Omorkanow gutlady, ol türkmen hokkeýçileriniň gowy taýýarlygyny, ýeňşe bolan erk-islegini belläp geçdi.
