Düýpli ylmyň we amaly ylmy-barlaglaryň ösmeginde, ylmy ösüşleriň önümçilige ornaşdyrylmagynda Türkmenistanyň Ylymlar akademiýasynyň ähmiýeti uludyr. Akademiýanyň fizika-matematika, himiýa, geologiýa we tehniki ylymlar bölüminiň müdiri, tehniki ylymlaryň doktory we TYA-nyň habarçy-agzasy Rahman Esedullaýew ýurdumyzyň geljekde hem durmuş-ykdysady ösüşinde, innowasiýa tehnologiýalaryny işläp taýýarlamak we ylmyň gazananlaryny önümçilige ornaşdyrmak boýunça wezipeleriň çözülişi barada gürrüň berdi. Ylymlar akademiýasynyň bu esasy bölümine önümçilik bilen has ýakyn baglanyşykly Tehnologiýalar merkezi, Himiýa instituty, Seýismologiýa we atmosfera fizikasy instituty degişlidir.
Olarda işleýän alymlar ylmy-barlag işlerini alyp barýarlar, olaryň wajyplygyna we hiline bölümiň ýolbaşçylary gözegçilik edýärler. Geçirilýän ylmy barlaglaryň netijesinde dissertasiýalar goralýar, ylmy monografiýalar we okuw kitaplary çap edilýär, işläp taýýarlamalaryň netijeleri ylmy makalalarda we ylmy-amaly maslahatlardaky çykyşlarda öz beýanyny tapýar. Ylmy işleriň köpüsiniň amaly ähmiýetine alymlara berilýän awtorlyk hukugy şahadatnamalary we patentler hem şaýatlyk edýär.
Ykdysadyýetiň dürli pudaklaryny ylmy taýdan ösdürmek, täze tehnologiýalary we nou-haulary ornaşdyrmak boýunça teklipleri taýýarlamaga aýratyn üns berilýär. Şu maksat bilen nebit-gaz pudagynda öndürijiligi ýokarlandyrmaga, alternatiw energiýany ösdürmäge, ýerli çig maldan daşary ýurtlarda öndürilýän önümleri ýurdumyzda öndürmäge gönükdirilen we beýleki möhüm meseleleri çözmäge niýetlenen 500-den gowrak ylmy maslahatlar hem-de teklipler bolan innowasiýa tehnologiýalaryň iki katalogy neşir edildi. Şol kataloglarda türkmen alymlarynyň saldamly ykdysady netijeleri bolan özboluşly işläp taýýarlamalary bilen birlikde Türkmenistanyň şertlerine we talaplaryna uýgunlaşdyrylan dünýäde gazanylan üstünlikler bar. Häzirki wagtda katalogyň täze, üçünji neşiri taýýarlanylýar, ondan önümçilikçi hünärmenler öz işini kämilleşdirmek üçin peýdaly köp zatlary öwrenip bilerler.
Ylmy teklipleri önümçilige ornaşdyrmak üçin alymlar «Türkmengaz», «Türkmennebit», «Türkmenhimiýa» Döwlet konsernleri, şeýle hem Türkmenbaşynyň nebiti gaýtadan işleýän zawodlar toplumy, Türkmenabat himiýa zawody, Ahalyň tebigy gazdan benzin öndürýän zawody we ýurdumyzyň beýleki öňdebaryjy kärhanalary bilen ýakyn gatnaşygy ýola goýdular.
