Türkmenistanly türgenler Gyrgyzystanda geçirilýän halkara okuw-türgenleşik ýygnanşyklarynda şu ýylyň noýabr aýynda Aşgabatda geçiriljek kuraş boýunça 14-nji dünýä çempionatyna taýýarlyga başladylar.
Halkara Kuraş assosiasiýasynyň (IKA) howandarlygynda Yssyk-Köl oblastynda geçirilýän taýýarlyk ýygnanşygynda Türkmenistanyň topary eýranly, gyrgyzystanly we özbegistanly pälwanlar bilen bilelikde türgenleşik geçýärler.
Türkmenistanyň at gazanan tälimçisi Dörtguly Tejenowyň ýolbaşçylygyndaky erkekler toparyndan 10 pälwan, Ýapyk binalarda we söweş sungaty boýunça 2017-nji ýylda geçirilen V Aziýa oýunlarynyň kümüş medalynyň eýesi Şirin Kubaýewanyň ýolbaşçylygyndaky zenanlar toparyndan 6 türgen geljekki ýaryşa taýýarlyk görýärler.
Türkmenistan Kuraş federasiýasynyň baş sekretary Öwez Atalyýewiň «AA»-nyň habarçysyna aýtmagyna görä, ildeşlerimiz Gyrgyzystandaky okuw-türgenleşik ýygnanşygynda 2023-nji ýylyň 23-nji sentýabryndan 8-nji oktýabry aralygynda Hytaýyň gündogaryndaky Çžeszýan welaýatynyň Hançžou şäherinde geçiriljek XIX tomuskyAziýa oýunlaryna hem-de ýurdumyzda geçiriljek dünýä çempionatyna taýýarlyk görýärler.
Kuraş boýunça geçiriljek Aziýa oýunlarynda Türkmenistanyň toparyna Muhammet Gurbanow (agramy 66 kg çenli), Işanmyrat Ataýew (90 kg çenli), Aýşirin Haýdarowa, Aýnur Amanowa (ikisi-de 52 kg çenli) we Jahan Muhammedowa (78 kg çenli) wekilçilik ederler.
Aşgabatda geçiriljek dünýä çempionatynda erkekleriň arasynda ýedi we zenanlaryň arasynda sekiz agram derejesinde medallaryň 15 toplumy ugrunda tutluşyklar göz öňünde tutulýar.
Geçen ýyl Hindistanyň Puna şäherinde geçirilen kuraş boýunça dünýä çempionatynyň baýraklary ugrunda 60 ýurduň wekilleri bäsleşildiler. Türkmenistana 13 pälwan (7 erkek we 6 zenan) wekilçilik etdi, olaryň üçüsi Watanymyza medally gaýdyp geldi.
Türkmenistanyň toparynda Lebap welaýatynyň Bedenterbiýe we sport baş müdirliginiň 2-nji sport mekdebiniň tälimçi-mugallymy Aýşirin Haýdarowa 48 kilograma çenli agram derejesinde kümüş, Lebap welaýat 7-nji sport mekdebiniň tälimçi-mugallymy Aýnur Amanowa (52 kg çenli) hem-de Türkmen döwlet bedenterbiýe we sport institutynyň talyby Aziza Gurbanowa (78 kg çenli) agram derejesinde bürünç medala mynasyp boldular.
Türkmenistanda wekilçilikli halkara ýaryşlary ozalam geçirilýär. 2017-nji ýylda paýtagtymyzyň Olimpiýa şäherçesinde Ýapyk binalarda we söweş sungaty boýunça V Aziýa oýunlary, 2018-nji ýylda agyr atletika boýunça dünýä çempionaty we «Amul-Hazar - 2018» Halkara awtorallisi geçirildi.
Şu ýylyň iýun aýynda türkmen paýtagtynda eýýäm ikinji gezek 12 ýaşa çenli oglanlaryň we gyzlaryň arasynda Merkezi Aziýa toparynyň tennis çempionaty geçirildi, oňa alty ýurtdan - Owganystandan, Gazagystandan, Gyrgyzystandan, Özbegistandan, Täjigistandan we Türkmenistandan ýaşajyk türgenler gatnaşdylar.
Indi Aşgabat dünýä derejesinde ýene bir uly ýaryşy geçirmäge taýýarlanýar. Kuraş boýunça dünýä çempionatyny ýokary derejede geçirmek maksady bilen Türkmenistanyň Prezidenti Serdar Berdimuhamedow 12-nji iýulda Karara gol çekdi, oňa laýyklykda ýaryşyň Guramaçylyk komiteti döredildi we onuň düzümi tassyklanyldy.
